د پاکستان تحریک انصاف ګوند مشر او پخوانی وزيراعظم عمران خان چې په اټک زندان کې بندي وو د اسلام اباد هايکورټ په حکم اډياله زندان ته منتقل کړی شوی دی.
د ځايي رسنیو ترمخه اسلام اباد هايکورټ پرون د نهې- سه شنبې په ورځ په ليکلې بڼه له اټک زندانه اډياله زندان ته د عمران خان د منتقل کولو حکم کړی وو. چیف جسټس عمر فاورق د ګل، دوشنبې په ورځ دا حکم کړی وو.
جج ويلي وو، په اټک زندان کې د عمران خان د ساتلو حکم د توشه خانې قضيه کې وو، خو اټارني جنرل منور اقبال دوګل عدالت ته ويلي وو، چې عمران خان د سايفر قضيه کې ګرفتار کړی شوی عدالت حکم یې په اټک زندان کې د ساتلو وو.
د توشه خانې قضيه کې عمران خان ته د بند او جرمانې سزا اورول شوې خو وروسته د اسلام اباد هایکورټ ياده سزا معطل کړې او د هغه په ضمانت د خوشي کولو امر یې کړی وو.
خو هم په هغه ورځ د افيشل سيکرټ اېکټ لاندې جوړ ځانګړي عدالت د سايفر قضيه کې د عمران خان په اټک زندان کې ساتلو لارښوونه کړې وه.
د رسنيو ترمخه، پرون د افيشل سيکرټ اېکټ لاندې جوړ ځانګړي عدالت د سايفر قضیې اورېدنه کړې او د عمران خان جوډيشل ريمانډ یې تر لسم اکتوبر پورې غځولی دی.
عمران خان تېر کال د اپرېل په مياشت کې د بې باورۍ د تحریک د لارې د وزيراعظمۍ څخه لرې کړی شوی، هغه وخت یې تور لګولی وو چې "د هغه حکومت د امريکې په سازش" لرې کړی شوی وو.
امريکې، د پاکستان پوځ او د پاکستان موجوده حکومت د عمران خان دغه تور څو ځله رد کړی چې ګنې هغه د امریکې په سازش لرې کړی شوی وو.
عمران خان د سایفر د لارې د امریکايي سازش د لومړي بيان وروسته په يو بل بيان کې ويلي وو سازش په اصل کې د دلته [پاکستان] نه شوی وو.
د تېرې جولايۍ په میاشت کې د عمران خان د پخواني پرنسپل سيکرټري اعظم خان یو مبينه بيان په مطبوعاتو خپور شوی، هغه ويلي وو، "عمران خان د سیاسي ګټو دپاره د سايفر يا بهرنۍ مراسلې ډرامه جوړه کړې او د سايفر د لارې یې د قامي امنيتي ادارو او ولس ترمنځه د کرکې خورولوهڅه کړې ده".
د شهباز شریف په وزيراعظمۍ د پاکستان تېر اتحادي حکومت د سايفر قضيې پلټنې پېل کړې وې، دا قضيه د عمران خان، شاه محمود قرېشي او اسدعمر پرضد جوړه شوې وه.
Forum