د پاکستان سرکاري خبري ادارې ويلي، د پاکستان نه د تورخم د لارې افغانستان ته د کډوالو بيرته ستنېدو لړۍ دوام لري او غېر قانونه کډوال بيرته ستنيږي. پاکستان په درېم اکتوبر اعلان کړی غېر قانونه غېر ملکيان دې د لومړي نومبر پورې په خپله د پاکستانه ووځي.
رېډيو پاکستان په خپل خبر کې ويلي، پرون د شورو/ چهارشنبې په ورځ د تورخم په پوله د 60 نه زياتې کورنۍ بيرته افغانستان ته ستنې شوي دي.
ویل شوي، په تېرو شپږو ورځو کې د 400 نه زياتې افغان کډوالې کورنۍ بيرته تللي دي.
د پاکستاني حکومت د غېر قانونه غېر ملکیانو وتلو د نېټې اعلانولو وروسته پاکستان کې مېشت افغان کډوال وايي په سخته ويره کې دي.
د پاکستان حکومت د غېر قانونه غېر ملکيانو د ويستلو اعلان کړی خو د تېرې ستمبر د میاشتې راهسې په ځانګړي ډول کراچۍ ښار کې د افغان کډوالو نيولو لړۍ پېل شوې وه.
د کډوالو په خبره د کراچۍ پوليس هغه کډوال هم نیولي چې قانوني اسناد ورسره وو، دوی د پېسو دپاره تنګول، نيول او ځورول شوي خو پوليسو دغه تورونه رد کړي او ويلي يې وو يواځې غېر قانونه غېر ملکيان نيسي.
د پاکستان د غېر قانونه غېر ملکیانو د ويستلو فېصلې ته پښتنو ملت پالو سياسي او مذهبي ګوندونو سخت غبرګون ويلی چې افغانان کډوال دې ونه ځورول شي.
په افغانستان کې د واکمنو طالبانو د دفاع وزیر مولوي محمد یعقوب هم د غېرقانوني افغان کډوالو د ورستنولو په اړه د پاکستان پرېکړه غندلې، دا یې له انصافه لرې بللې او د پاکستان له خلکو، سیاستوالو او دیني عالمانو یې غوښتي چې خپل چارواکي له داسې کارونو را وګرځوي.
خو پاکستان ويلي، د غېر قانونه غېر ملکيانو فېصله يواځې د افغانانو دپاره نه ده د ټولو غېر قانونه غېر ملکیانو دپاره ده.
پرون د پاکستان د نګران حکومت د اطلاعاتو وزیر مرتضا سولنګي په خبري غونډه کې بيا تکرار کړې، د هغو افغان کډوالو ضد هیڅ کارروايي نه کيږي څوک چې پي او آر کارډ لري.
هغه ویلي، هغه افغان کډوال چې افغان سيټيزن کارډ لري د هغو خلاف هم کارروايي نه کيږي.
نوموړي زياته کړې، د 31م اکتوبر پورې مهلت يا وخت هغو کسانو ته ورکړی شوی چې ووځي څوک چې ويزا يا قانوني اسناد نه لري.
Forum