امریکا له یو جنرل سره خپل سلاکاران او دفاعي سیسټم په جنګي پلان کې د مرستې لپاره اسرایل ته لېږلي

پېنټاګان د جګړې په پلان جوړولو کې د مرستې لپاره د ښاري جګړو د ماهر د سمندري ځواکونو د یوه جنرال په ګډون پوځي سلاکاران اسرایل ته لېږلي دي، بلې خواته د فرانس صدر ایمانویل میکرون هم د خواخوږۍ او په غزه کې د عامو خلکو د ژغورنې د هڅو لپاره اسرایل ته رسېدلی دی.

امریکا پر غزې پټۍ د اسرایلو تر ممکنه مځکنیو بریدونو مخکې منځني ختیځ‌ ته خپل نوی فضایي دفاعي نظام لېږي، خو ورسره واشنګټن د خپلې عملې د ژغورنې هڅه هم کوي چې له تېرو څو ورځو له بریدونو سره مخ ده.

فرانس هم د خپلې دفاع لپاره د اسرایل ملاتړ ښکاره کړی او روانه اوونۍ یې اعلان وکړ چې فلسطیني وګړو ته به د بشري مرستو یوه بیړنۍ الوتکه ولېږي.

د اسرایل پوځ ویلي، د نهې- سه شنبې په ورځ یې هم په غزه باندې هوایي‌ بریدونو ته دوام ورکړی او وایي د حماس د فعالیت څو مرکزونه یې هم ویشتلي چې وایي د دې ډلې یو شمېر مرستیال کمانډران یې پکې وژلي دي.

په امریکایي عملې باندې د بریدونو په ځواب کې پېنټاګان اعلان وکړ چې د پېټریاټ میزایلو دفاعي سیسټم د څو ډلو او د لوړوالي د ځای ټرمینل های دفاعي سیسټم له لېږلو سره سره آیزن هاور بریدګره ډله په منځني ختیځ کې پر ځای کوي.

د دې سلاکارې ډلې په مشرۍ کوونکو افسرانو کې یو د امریکې د سمندري ځواکونو لېفټیننټ جنرل جېمز ګلین دی چې تر دې مخکې یې د عراق په فلوجه کې په ښاري سیمو کې د داعش ډلې خلاف په ځانګړو عملیاتو کې برخه اخیستې وه.

دا خبره یوه امریکایي چارواکي له دې کبله د نوم نه څرګندولو په شرط کړې چې د جنرل ګلین د رول په اړه د خبرو واک ورسره نه وو.

دغه چارواکي ویلي جنرل ګلین به یواځې اسرایلي پوځ ته مشورې ورکوي چې په ښاري‌ جګړه کې د عامو خلکو مرګ ژوبله کمه شي او وایي لېږل شوي امرکایي سلاکاران به خپله په جګړه کې برخه نه اخلي.

اسرایل د غزې د شمال په داسې چاپیریال کې پراخو مځکنیو عملیاتو ته تیارۍ کوي چې حماس پکې کلونه د ټنلونو نیټورکونه جوړ کړي او په ښاري بلاکونو کې یې جالونه خپاره کړي دي.

د امریکې د ملي امنیت شورا ویاند جان کربي د دوشنبې- ګل په ورځ وویل، ګلین او نور پوځي افسران چې اسرایلو ته سلا مشورې ورکوي، "د هغسې عملیاتو مناسبه تجربه لري چې اسراییل یې کوي".

دا پوځي ډله د پېنټاګان له هغو چټک حرکت کوونکو ډلو څخه ده چې هڅه کوي د اسرایل او حماس تر منځ د جګړې مخه ونیسي چې د منځني ختیځ نورو سیمو ته پسې پراخه نه شي.

امریکايي چارواکي وايي، اسرایلو ته یې مشوره ورکړې پر غزې پټۍ خپل پلان کړي مځکني بریدونه دې وځنډوي چې د یرغمل شویو کسانو د را خوشي‌ کېدو په اړه له حماس سره خبرو ته نور وخت ورکړل شي. وایي کېدای شي دا مځکني بریدونه د یرغمل شویو کسانو په اړه هر ډول مذاکرات لا نور پېچلي کړي.

اسرایلو تر ممکنه مځکنیو عملیاتو مخکې د غزې پولې ته نیژدې درې لکه پوځیان پر ځای کړي دي.

د فلسطین د روغتیا وزارت د دوشنبې- ګل په ورځ وویل، په غزه کې د دوو اونیو په جګړو کې د وژل شویو کسانو شمېره 5,087 تنو ته رسېدلی او د ټپیان شمېر تر 15,273 زیات شوی دی.

د اسرایلي ځواکونو بریدونو په غزه کې زرګونه ودانۍ تباه کړې دي او د ملګرو ملتونو د بشري مرستو اداره وايي 1.4 میلینه یعنې څورلس لکه خلک بې ځایه شوي دي.

یادونه:- د دې خبر ډېر معلومات له اې پي خبري ایجنسۍ اخیستل شوي دي.