روس او چین د ملګرو ملتونو امنیت شورا کې د غزې د ناورین په اړوند د امریکایي قرارداد مسوده ویټو کړې ده

ددې نوي قرارداد په اړه د امریکې خارجه وزیر انتوني بلنکن تېره ورځ ویلي وؤ چې په دې وروستیو کې د امنیت شورا د غړو کومې حقیقي رایې مخې ته راغلي دي هغه په دې قرارداد کې شاملې کړل شوي دي.

امریکا، چين، فرانس، روس او برتانیا د ملګرو ملتونو د امنیت شورا مستقل غړي دي اؤ مستقل غړي کولی شي چې قرارداد ويټو يا رد کړي او کارروايي پرې ودريږي.

ملګروملتونو د شورو یا چهارشنبې په ورځ خبرداری ورکړی چې د غزې په پټۍ کې بشري ناورین یو "بي ساري حالت" ته رسېدلی دی.

د ملګروملتونو ویاند سټیفن ډوجارېک خبریالانو ته ویلي، "د ملګروملتونو د مرستو او کار ادارې (UNRWA) چې په غزه کې تر ټولو ستره بشري مرستندویه اداره ده خبرداری ورکړی چې دوی به مجبوره شي چې نن شپه ټول عملیات ودروي."

هغه وویل، روغتونونه بندېږي ځکه د سون توکي، اوبه، طبي وسایل او کارکونکي نه لري. تېل زښت زیات کم شوي او یواځې په ډېرو مهمو ودانیو کې کارول کېږي.

ملګري ملتونه څلور لکه لیټره تېل لري چې د څو ورځو راهیسې غزې ته له مصر څخه په رفعه پوله باندې تېرېدو ته انتظار باسي.

تر اوسه پورې اسرایلو د خوندي انتقال په اړه امنیتي ضمانتونه نه دي ورکړي او دلیل دا یادوي چې حماس ترې په زیاته اندازه تېل ترلاسه کوي او پر حماس تور لګوي چې له دغو تېلو څخه لږ تر لږه یوه اندازه یې پوځي موخو ته اړوي.

د اکتوبر په اوومه حماس په اسرایل برید کړی ؤ چې د رپورټونو له مخې په دې برید کې د بهرنیو په ګډون 1400 اسرایلیان وژل شوي اؤ ګڼ شمیر نور بیا حماس د ځان سره بوتللي اؤ‌ یرغمال کړي‌ دي.

د حماس د برید نه وروسته په ځوابي توګه اسرایلي پوځ په غزه کې پرله پسې بریدونه کړي دي اؤ رپورټونه وایي په دې بریدونو کې د وژل شویو فلسطینیانو شمېر لږ تر لږه 6546 تنو ته رسېدلی چې اکثره یې ښځې او ماشومان دي.