په کاناډا کې یو ځل بیا د یهودانو پر ښونځي باندې ډزې شوي

واشنګټن – د کاناډا په مونټریال کې د یهودانو پر یو ښونځي (سکول) باندې د اتوار یا یکشنبې په ورځ ډزې شوي.

پولیسو ویلي، د اسرایلو او حماس ترمنځ د جګړې پر سر دا په کاناډا کې له یوې اونۍ په کم وخت کې د یهودانو په ښونځیو باندې دریم برید دی چې ترسره کېږي.

په دغه برید کې څوک ژوبل شوي نه دي خو د پېښې په ځای کې سړکونه تړل شوي وو.‌

سي ان بي سي نیوز خبر ورکړی چې وروسته له هاغې چې د سیمې د خلکو لخوا ډزې واورېدل شوې نو د پېښې په ځآی د ګولیو لګېدلو نخښې او کارتوس وموندل شول.

راپورونه وايي، د مانټریال د دوو نورو ښونځیو په دروازو باندې هم د ګولیو لګېدلو سوري ښکاري.

په دغو ښونځیو باندې د زیارت یا پنجشنبې په ورځ ډزې شوې وې.

دا لا نه ده روښانه چې د ښار په جنوبي برخو کې د یهودانو په ښونځیو باندې شوې پېښې له دوی سره کومه اړیکه لري او که نه.

خو راپور وايي، د شورو یا چهارشنبې په ورځ په کانکورډیا پوهنتون کې د اسرایل غزې د شخړې پر سر د دواړو خواوو ترمنځ اخ او ډب کې خلک ژوبل شوي‌ او نیول شوي هم دي.

دغه ډول په ټورانټو کې، پولیسو خبر ورکړی چې د اسرایلو او حماس له شخړې وروسته په دریو اونیو کې د یهودانو او مسلمانانو پرضد د نفرت پېښې د ۲۰۲۲ کال په پرتله دوه چنده زیاتې شوې دي.

اسرایل وايي، د حماس لخوا د اکټوبر د اومې په برید کې یې کابو ۱۲۰۰ کسان وژل شوي او ۲۴۰ تښتول شوي دي.‌

د هغې په غبرګون کې حماس په فلسطینانو باندې هوايي او ځمکني بریدونه کوي چې د فلسطین د روغتیا وزارت د معلوماتو له مخې تر اوسه پورې پکې تر ۱۱۰۰۰ زیات فلسطینیان وژل شوي.