د بشري حقونو په نړیواله ورځ په افغانستان کې د ملګرو ملتونو سیاسي استازولۍ یوناما ویلي په افغانستان واکمن طالبان باید د بشري حقونو په اړوند خپلې ژمنې پوره کړي اؤ خلکو ته دې د هغوي بشري حقوق ورکړي.
نن د ډسمبر لسمه په نړۍ کې د بشري حقونو د ورځې په توګه نمانځل کیږي. سږکال دا ورځ د بشري حقونو د نړیوالې اعلامیې د منظوریدو د ۷۵ کلیزې په مناسبت په نړۍ کې د ځانګړو مراسمو په ترڅ کې نمانځل کیږي.
سږکال د بشري حقونو نړیواله ورځ د افغانستان دننه په داسې حال کې نمانځل کیږي چې په کال 2021م کې د طالبانو لخوا بیا د افغانستان په واکمنۍ له قبضې کولو راپدیخوا په دغه جګړه ځپلي هیواد کې د طالبانو د خلکو نه د هغوي بشري حقوق اؤ ازادۍ تروړلې دي چې له دغه وضعیته تر ټولو زیاتې افغان مېرمنې اؤ نجونه اغېزمنې شوې دي.
طالب واکمنو ولسي ځایونو کې د مېرمنو په ګرځېدو، پوهنتونونو اؤ سینګار خونوته د نجونو په تګ ، دفترونو کې په کار کولو اؤ د یوې خاص فاصلې نه اخوا د ښځو په یوازې سفر کولو بندیزونه لګولي دي چې له دې امله په ټولنیز ژوند کې د ښځو برخه ختمه شوې اؤ د طالبانو لخوا لګول شوؤ دې بندیزونو په پراخه کچه نړیوال غبرګونونه راپارولي دي.
د ملګرو ملتونو سیاسي استازولۍ د بشر د حقونو په ورکړه کې د طالبانو ناکامۍ ته ګوته نیولې ده اؤ پخپله اعلامیه کې یې ویلي دي چې طالبان د محکمو تر شا وژنو ، تشدد، ناوړه چلند ، جسماني سزاګانو اؤ د خپلې خوښې په اساس دخپلو مخالفینو په نیولو اؤ ځورولو کې ککړ دي.
اعلامیه وایي افغانستان کې چې کوم خلک د بشري حقونو په پلوۍ غږ پورته کوي نو هغوي د طالبانو لخوا نیول کیږي، ځورول کیږي اؤ د بندیزونو سره مخ کیږي.
افغانستان کې د د ملګرو ملتونو د بشري حقونو هائی کمشنرې فیونا فریزز وایي "موږ د بشري حقونوافغان فعالینو ته پېرزوینې وړاندې کولو اؤ هغوي سره خپل پیوستون ښایو ځکه چې په دوي کې اکثره فعالین د بشري حقونو لپاره د غږ پورته کولو ، دامن اؤ انصاف په غوښتلو اؤ د بنیادي ازادۍ د اصولو په طرفدارۍ کولو دروند قیمت پرېکوي"
افغانستان کې د ملګرو ملتونو د سیاسي استاوزلۍ مشرې روزا اوتن بانیفا ویلي د افغانستان د یو خوشحاله اؤ سوکاله راتلونکي لپاره باید خلکو ته د هغوي ټول بشري حقوق ورکړل شي.
دا په داسې حال کې ده چې امریکې د جمعې په ورځ افغانستان کې د بشري حقونو څخه په سرغړونې کولو په دوؤ طالب چارواکو بندیزونه لګولي دي.
د امریکې د بهرنیو چارو محکمې ویلي طالب چارواکي فرید الدین محمود د شپږم صنف نه بره د د ښځو اؤ نجونو د تعلمیي ادارو د تړلو پرېکړې کړې دي اؤ د ښځو او نجونو په تعلیم د محدودیتونو ملاتړ یې کړی دی.
امریکې د طالبانو په بل چارواکي خالد حنفي هم بندیزونه لګولي اؤ هغه یې هم د ښځو اؤ نجونود حقونو په سرغړونه تورن کړی
په افغانستان د واکمنو طالبانو د حکومت ویاند ذبیح الله مجاهد دا بندیزونه غندلي اؤ پخپل یو بیان کې یې ویلي چې بندیزونه مسلط کول د ستونزې حل نه دی .
هغه په امریکې تور لګولی چې د اسرایل په ملاتړ کولو نړۍ کې تر ټولو ستر د بشري حقونو پایمالونکی هیواد دی.
مجاهد ویأي دي په نورو خلکو د بشري حقونو د سرغړونو تور لګول اؤ بیا په هغوي بندیزونه لګول هیڅ جواز نه لري اؤ یو غیر منطقي عمل دی.
په ښځو اؤ نجونود طالبانو لخوا لګول شوي محدودیتونه د دوي د حکومت په رسمیت د پېژندنې په لړ کې تر ټولو ستر خنډ دی.
Forum