واشنګټن – امریکا او برتانیې د شورو یا چهارشنبې په ورځ خپل څلورم دور بندیزونه د غزې په کنټرول کې له اسرایلي ځواکونو سره د جګړې لپاره د حماس د پیسو راټولولو پر عملیاتو لګولي.
د امریکا د خزانې وزارت په یو بیان کې ویلي، دغه نوي بندیزونه په ترکیه او نورو ځایونو کې په هغو اتو کسانو باندې لګول شوي چې په بهر کې یې د حماس د ګټو استازیتوب کاوه او د هغوی مالی چارې یې سمبالولې.
د ترهګرې او مالي معلوماتو په برخه کې د خزانې وزارت مرستیال براین نیلسن ویلي، "حماس په دوامداره توګه په هغو شبکو باندې تکیه لري چې د حماس د ګټو لپاره د پیسو راټولو کمپاین کوي تر څو په غزه کې د هغوي له پوځي فعالیتونو څخه ملاتړ وشي."
د امریکا خزانې وزارت په ترکیه کې د حماس د مهمو مالي ملاتړ کونکو څخه یو تن هارون منصور یعقوب ناصر الدین یاد کړی.
د خزانې وزارت ویلي، چې دغه کس په هغې شبکه کې کار کوي چې له ترکیې او له غزې څخه په لویدیځه غاړه کې د حماس د قوماندې مرکز ته پیسې استوي چې لویدیځه غاړه نوره هم نارامه کړي.
په دغو بندیزونو کې د حماس د ملاتړو ټولې هغې پانګې کنګل شوي کومې چې ښايي په امریکا کې وي او په راتلونکې کې هم له امریکايي او برتانوي بانکونو سره د پیسو راکړه ورکړه نشي کولای.
امریکا او برتانیې تر دې مخکې درې پړاوه نور بندیزونه په حماس باندې وروسته له هاغې ولګول چې د اکټوبر په اوومه نېټه یې په اسرایلو باندې برید وکړ، ۱۲۰۰ کسان یې ووژل او ۲۴۰ نور یې له ځان سره وتښتول.
د دې په غبرګون کې اسرایلو په غزه کې د حماس د واکمنۍ د ختمولو لپاره عملیات پیل کړل چې تر اوسه پورې پکې تر ۱۸۰۰۰ زیات فلسطینیان وژل شوي.
امریکا او برتانیه دواړه حماس یوه ترهګره ډله بولي.
Forum