د چترال په غرونو کې امریکایي وګړي د تاریخ په تر ټولو لوړه بیعه د مارخور ښکار کړی دی

په تاریخ کې په وړومبي ځل د امریکې یو وګړي تر ټولو په لوړه بیعه د خېبر پښتونخوا په چترال سیمه کې د مارخور ښکار کړی دی.

د اتوار/یکشنبې په ورځ د پاکستان جیو نیوز رسنۍ د ځنګلي ژوند د څارنې محکمې د سرچینو له خولې ویلي چې امریکایي وګړي د چترال په غرونو کې د مار خور نومي ځناور د ښکار د اجازې سند د ټیکس په شمول په 2 لکه اؤ 32 امریکایي ډالرو ترلاسه کړی ؤ.

تر دې مخکې یو امریکایي وګړي په چترال کې په دوه کروړه اؤ 20 لکه پاکستاني روپیو د مارخور د ښکار اجازه ترلاسه کړې وه اؤ په استور سیمه کې بیا د مار خور د ښکار اجازه په یو لکه اؤ 86 زره ډالرو ورکړل شوې وه.

د پښتونخوا د ځنګلي ژوند د څارنې د محکمې وینا ده چې په دوه لکه اؤ 32 زره ډالر د مارخور د ښکار اجازه ورکول د تاریخ تر ټولو لوړه بولي ده.

سرچینې ویلي چې امریکایي وګړي د چترال په غرونو کې د مارخور د ښکار دا اجازت نامه سږکال د اکتوبر په میاشت کې ترلاسه کړې وه.

مارخور چې نسل يي د خطر سره د مخ ځنګلي ځناورو په نوملړ کې شامل کړی شوی، د پاکستان قامي ځناور دی او په خېبر پښتونخوا کې هر کال د دغه ځناور د ښکار جايزې پروګرام د لارې څلورو اجازت نامو دپاره بولي کيږي.

په دې بولۍ کې د نړۍ د بیلابیلو هیوادونو وګړي برخه اخلي.

د خېبر پښتونخوا ځنګلي ژوند د څارنې د ادارې تر مخه د مارخور نسل يي له کلونو راهسې خوندي ساتلی او په چترال کې ددې ځناورو شمېره تر 5500 او کوهستان کې تر 1000 پورې ده.