اسرایل د حماس مهم مشر صالح العاروري په لبنان کې په ډرون برید کې وژلی دی

د حماس ډلې چارواکي او د حزب الله ډله وايي د لبنان د مرکز بیروت په شاوخوا کې د حماس یو مشر صالح العاروري او د دې ډلې درې غړي د اسرایل په برید کې وژل شوي دي. حماس دا برید غندلی او حزب الله دا د لبنان پر ملي خپلواکۍ برید بللی دی.

امریکې تېر کال د العاروروي پر سر جایزه اعلان کړې وه او ویلي یې وو که هر چا داسې معلومات ورکړل چې په بنیاد یې العاروري پیدا شي پینځه میلین ډالر به ورکوي.

د لبنان د سرکاري خبري ایجنسۍ د رپوټ له مخې دا د اسرایل د یوې بې پایلټه الوتکې یا ډرون برید وو چې وایي د فرورۍ په دویمه د شپې د بیرت په مشرفیه سیمه کې یې د حزب الله غړي په نخښه کړي او ټول څلور تنه پکې وژل شوي دي.

صالح العاروري د حماس ډلې د پوځي څانګې قسام بریګېډز له بنیاد ایښودونکو څخه ګڼل کېده او څه موده په لوېدیځه غاړه کې د دې ډلې پوځي مشر و. ځینو رسنیو هغه د حماس ډلې دویم لوی مشر یاد کړی دی.

د اسرایل پوځ په دې اړه له څه ویلو ډډه کړې ده، خو دا ډول برید د حماس د مهمو مشرانو د وژلو په اړه د اسرایل د حکومت له ارادې سره سم ښکاري، ځکه چې په غزه پټۍ کې له حماس سره جګړه درو میاشتو ته نیژدې شوې ده.

د اسرایل د دفاعي ځواکونو ویاند رېر ایډمرل ډېنیل هګاري د صالح العاروري د وژل کېدو په اړه د پوښتنې په جواب کې وویل، د پوځ لپاره یې "نن شپه تر ټولو مهمه خبره دا ده چې موږ له حماس سره پر جګړې تمرکز کوو".

د اسرایل وزیراعظم بنیامین نتنیاهو د اکتوبر د اوومې نېټې تر برید مخکې هم د العاروري د وژلو ګواښ کړی وو.

که اسرایل په دغه برید کې لاس ولري، کېدای شي په منځني ختيځ کې د شخړې د پراخېدو سبب شي، د حزب الله ډلې مشر سید حسن نصرالله خبرداری ورکړی وو چې په لبنان کې به د حماس پر مشرانو د اسرایل د هر ډول برید غچ اخلي.

د حماس ډلې یو ویاند باسم نعیم اسوسیېټډ پرس ته د العاروري وژل کېدل تایید کړي دي. د حزب الله ډلې یو چارواکي د نوم نه ښکاره کولو په شرط منلې ده چې په برید کې العاروري وژل شوی دی.

اسرایل العاروري په دې تورن کړی وو، چې د دغه هېواد په پوځيانو باندې یې څو بریدونه پلان کړي او تر سره کړي دي، له همدې کبله یې په اکتوبر کې په لویدیځه غاړه کې د هغه کور ویجاړ کړی وو.

په اسرایل باندې د حماس له برید او د غزې له جګړې وروسته د لبنان په جنوب کې د حزب الله ډلې د جنګیالیو او اسرایل تر منځ څو ځله ډزې تبادله شوې دي.

د العاروري تر وژل کېدو څو ساعته مخکې د حزب الله ډلې ویلي وو، د اسرایلي پوځ پر څو پوستو یې بریدونه کړي دي.

حماس ډلې په یوه بیان کې پر العاروري برید غندلی او دا یې د اسرایل "ترهګر" عمل بللی دی. حماس دا برید په جګړه کې یو خطرناک پرمختګ بللی او وایي "دا جرم به بې جوابه یا بې سزا نه پاتېږي".