واشنګټن – د بایډن د ادارې لوړ پوړو چارواکو د اسرایلو د دفاع له وزیر یوېو ګېلېنټ څخه غوښتي چې د غزې په جنوبي ښار رفع باندې دې پلانونه ودروي.
رفع هغه ځای دی چې ۱.۴ میلیونو ملکي فلسطینیانو پکې پناه اخیستې.
د امریکا د دفاع وزیر لویډ اسټن او د بهرنیو چارو وزیر انټنی بلېنکن یو ځل بیا له اسرایلو څخه د خپل ځان د دفاع په برخه کې ملاتړ څرګند کړی خو د لومړي وزیر نتن یاهو له هغو پلانونو سره یې یو ځل بیا مخالفت څرګند کړی چې غواړي له مصر سره پولې ته نېږدې د غزې له جنوبي پولې سره په رفع کې عملیات ترسره کړي.
یو لوړ پوړي امریکايي ډېپلوماټ د نهې یا سې شنبې په ورځ خبریالانو ته وویل، "زمونږ هدف دا دی چې اسرایل د پوځي عملیاتو او ښايي د نیمګړو پوځي عملیاتو پرځای چې یو میلیون ملکي وګړي ورسره په خطر کې غورځي یو بله لاره ومومي."
دغه چارواکي د خپل نوم د نه ښودلو په شرط چې د پنټګان اصول دي دا خبرې کړي.
په ورته وخت کې د بهرنیو چارو د وزارت ویاند متیو مېلر د ګل یا دوشنبې په ورخ وویل، چې په رفع کې لوی ځمکني عملیات به د فلسطیني ملکیانو سره د خیر ښېګڼې کارونه ویجاړ کړي.
هغه زیاته کړه، چې بلېنکن ګېلېنټ ته وویل، داسې "بدیلې لارې" شته چې هم ورسره د اسرایلو امنیت خوندي کېږي او هم ورسره ملکي وګړي ژغورل کېږي.
په غزه کې د ولږې له زیاتوالي سره د امریکا د دفاع وزیر اسټن د "بشري فاجعې" خبرداری ورکړی او ملکي تلفات یې ډېر زیات او مرستې "ډېر زیاتې لږې" بللې.
اسټن د بلېنکن په څېر له اسرایلو غوښتي چې "په سمدستي توګه دې نوره مرسته زیاته کړي."
Forum