د پاکستان د بهرنیو چارو د وزارت ویاندې ممتاز زهرا بلوڅ ويلي، "پاکستان د ترهګرۍ ډلې ټي ټي پي (تحریک طالبان پاکستان) سره هیڅ ډول خبرې نه کوي، مونږ د ټي ټي پي سره د خبرو هیڅ پلان نه لرو".
د زيارت/ پنجشنبې په ورځ اوونيزه خبري غونډه کې ممتاز زهرا بلوڅ وویل، د پاکستان هغه پخوانی دريځ به تکرار کړي چې د ټي ټي پي سره هيڅ ډول خبرې نه کوي او زياته کړې یې ده، "مونږ د افغان چارواکو نه تمه لرو چې د ترهګرو ډلو او مشرانو پرضد یې اقدام وکړي، د کومو جرمونو او ترهګرو بريدونو چې دوی په پاکستان کې زمه واري منلې".
د پاکستان د بهرنيو چارو د وزارت وياندې دغه څرګندونې په داسې وخت کې کړي چې په افغانستان کې د واکمنو طالبانو د کورنيو چارو د وزارت مرستیال محمد نبي عمري د پاکستان حکومت او تحریک طالبان پاکستان (ټي ټي پي) ته مشوره ورکړې، "په خپل مينځ کې سره جوړ شئ مذاکرات وکړئ او روغه جوړه وکړئ".
محمد نبي عمري دغه خبره د نهې/سه شنبې په ورځ په خوست کې راجوړې يوې غونډې ته په وينا کې کړې ده. د عمري د وينا ويډيو طلوع نيوز په اېکس (پخواني ټويټر) خپره کړې ده، نوموړي په کې د ټي ټي پي د نوم اخستو پرته ويلي، "یوه مشوره به ورکړو پاکستان ته هم، او هغه وروڼه چې د دوی سره جنګيږي هغوی ته هم، چې جنګونه او انقلابونه مونږ ليدلي دي، جنګونه او انقلابونه کونډې پېدا کوي، يتيمان پېدا کوي، وطن ورانوي، اقتصاد ختموي، نظام تباه کوي، په خپل مينځ کې سره جوړ شئ مذاکرات وکړئ روغه جوړه وکړئ".
د پاکستان د خارجه وزارت له ترجمانې، ممتاز زهرا بلوڅ نه پوښتنه شوې، د داسو د بريدونو وورسته په رپورټونو کې ويل شوي، ترهګر د افغانستان نه راغلي د پاکستان او چين دوستي یې په هدف کړې ده، تاسو پرې څه وايئ؟
هغې ویلي، د پاکستان قانون نافذوونکې ادارې د پلټنو د بشپړو په عمل کې دي او چې کله سر ته ورسي معلومات به یې خپاره کړي.
مېرمن بلوڅ زياته کړې، پاکستان د ټولو ترهګرو ډلو او ټولو هغو قوتونو سره جګړې ته ژمنه ده چې پاکستاو د پاکستان چين دوستي په هدف کوي، پشمول د بشام د تازه بريد.
په 26م مارچ د خېبرپښتونخوا د شانګله په بشام سيمه کې په یو ځانمرګي برید کې د پینځو چینایي اينجينيرانو له وژل کېدو وروسته پاکستان بیا تور لګولی وو چې ټي ټي پي او نورې ترهګرې ډلې په افغانستان کې خوندي ځالې لري.
په افغانستان کې واکمنو طالبانو د چينايانو په وژنه افسوس څرګند کړی وو. ټي ټي پي په دغه برید کې لاس لرل رد کړي او دعوه کوي په پاکستان کې موجود دي.
پاکستان د اوږدې مودې نه تور لګوي په افغانستان کې د طالبانو په واک کې د راتلو وروسته په پاکستان کې ناامني سېوا شوې او دعوه کوي د افغانستان خاوره د پاکستان پرضد د ترهګرۍ دپاره کاريږي، خو طالبان د پاکستان دغه تورونه ردوي.
Forum