د پاکستان د کابينې اقتصادي رابطه کمېټۍ (اي سي سي) د داسو هايډرو پاور پروجېکټ منصوبه کې د وژل شوو چينايانو دپاره د 2.58 ميلينه ډالرو يا 25 لکه 80,000 ډالرو ورکولو منظوري ورکړې ده.
د خزانې د وزير محمد اورنګزېب په مشرۍ د اقتصادي رابطه کمېټۍ غونډه پرون شوې ده. ويل شوي په ياده پېښه کې د وژل شوي ځايي تن دپاره 25 لکه روپو ورکولو منظوري هم ورکړل شوې ده.
په 26م مارچ د خېبرپښتونخوا د شانګلې ضلعې په بشام کې د داسو ډېم په چينايي انجينيرانو ځانمرګی برید شوی، پينځه چينايي وګړي او پاکستانی ډرايور یې پکې وژل شوي وو.
د بشام د پېښې وروسته چین د پاکستان نه د برید د بشپړه پلټنو او د خپلو وګړو د تحفظ غوښتنه کړې وه او هم یې له خپله انده د پېښو پلټنو لپاره یو پلاوی د بیجنګ نه پاکستان ته لېږلی وو.
په اوومه مې د پاکستان د پوځ وياند مېجر جنرل احمد شريف چودري په خبري کانفرنس کې د ياد بريد په اړه ويلي وو، "په دغه بريد کې پينځه چينايي او يو پاکستانی وژل شوي او د دغه بريد منصوبه بندي هم په افغانستان کې شوې، خودکش بمبار هم افغان وګړی وو، پاکستان د دغو پېښو په کلکه غندنه کوي".
د پاکستان د پوځي وياند دعوې ته په ځواب کې په افغانستان کې د واکمنو طالبانو د دفاع وزارت وياند عنايت الله خوارزمي دغه تورونه رد کړي او ويلي يې وو، د خېبرپښتونخوا په يوه داسې سيمه کې، چې "د پاکستان د پوځ د کلک امنيت لاندې ده، د چينايانو وژل کېدل د پاکستاني امنيتي ارګانونو کمزوري او یا هم له حمله کوونکو سره همکاري په ډاګه کوي".
د روانې میاشتې په نهمه نېټه د پاکستان د کورنيو چارو وزارت ويلي وو، د کورنيو چارو وزير محسن نقوي د چين سفير جيانګ زي ډونګ سره ليدلي، او د بشام د پېښې په اړه شوي پرمختګ باندې یې ورسره خبرې اترې کړې وې.
د اپرېل د میاشتې په وروستيو کې د خېبر پښتونخوا د ترهګرۍ ضد محکمې دعوه کړې وه بشام کې د چین په انجنیرانو شوي ځانمرګي برید کې د ککړتیا په تور یې د تحریک طالبان پاکستان (ټي ټي پي) څلور ترهګر نیولي وو.
سي ټي ډي دعوه کړې وه، په نيول شوو ترهګرو کې د مرکزي ملزم عادل شهباز تعلق د افغانستان د ننګرهار ولایت جلال اباد سیمې سره، او د نورو پېژندګلو د محمد شفیق قرېشي، زاهد قرېشي او نذیرحسېن په نومونو شوې او د هغوي تعلق د پښتونخوا د مانسهرې سیمې سره دی.
د پوځ ویاند په خبري کانفرنس کې ويلي وو، پاکستان کې خواوشا 29,000 چينايي وګړي موجود دي، په دوی کې خواوشا 25,00 په سي پيک پروژو کار کوي، او 5000 خواوشا په نورو پرمختيايي پروژو کار کوي پوځ او نورې امنیتي ادارې ته تحفظ ورکوي.
د پاکستان د کورنيو چارو وزیر محسن نقوي د چين د سفير سره په ليدنه کې ويلي وو، د بشام پېښه د پاکستان او چين په دوستۍ بريد وو، په پېښه کې ککړ عناصر به په هر صورت منطقي انجام ته رسولی شي.
د اقتصادي رابطه کمېټۍ په غونډه کې د هوابازۍ وزارت لخوا په نيويارک کې د روز ويلټ هوټل چلولو او خرڅونو دپاره د نيشنل بېنک سره پرتو اتو ميلينو يا 80لکه ډالرو کارولود سمرۍ منظوري هم ورکړې ده.
د پاکستاني مطبوعاتو ترمخه، په کال 2020م کې د روز ويلټ هوټل د بنديز وروسته د نيشنل بېنک څخه يو کروړ او 50 لکه ډالره په پور اخستل شوې وې.
Forum