د ګلوبل ټیروریزم انډیکس (جي ټي آی) په راپور کې راغلي دي چې پاکستان د نړۍ د ۱۶۳ هېوادونو ترمنځ د ترهګرۍ له پلوه پنځم ځای لري.
د جي ټي آی راپور وايي، عراق له ترهګرۍ سره د مخامخ هېوادونو د کتار په سر کې ځای لري او افغانستان، ناجیریا او سوریه ورپسې په ترتیب پراته دي.
په راپور کې ویل شویدي چې په پاکستان کې د ترهګریزو پېښو له امله د وژل شویو کسانو په شمېر کې کموالی راغلی.
راپور وايي په پاکستان کې په ۲۰۱۶ کې د ترهګرۍ له امله ۹۸۶ کسان وژل شویدي چې دا د تېر کال په پرتله ۱۲ فیصده او د ۲۰۱۳ کال په پرتله ۵۹ فیصده کموالی ښيي.
د ۲۰۰۷ کال راهیسې پاکستان د ترهګرۍ په نوملړ کې یواځې یو ځل څلورم ځای راخپل کړی وه او شپږ ځله یې پدې کتار کې دوهم ځای نیولی دی.
د جي ټي آی راپور د ګلوبل ټریرویزم ډیټابیس (جي ټي ډي) د معلوماتو پر بنسټ چمتو شوی چې په نړۍ کې د ترهګرۍ د پېښو د ثبت په برخه کې تر ټولو ستر ډیټابیس دی.
په جي ټي ډي کې تر اوسه پورې تر ۱۷۰۰۰۰ زیاتې ترهګریزې پېښې ثبت شویدي.
د راپور له مخې دا دوهم کال دی چې په نړۍ کې د ترهګریزو بریدونو په ترڅ کې د وژل شویو کسانو په شمېر کې کموالی راغلی.
دا پدې معنی چې په ۲۰۱۶ کال کې د ۲۰۱۴ کال په پرتله په ترهګریزو پېښو کې د مرګ ژوبلې کچه ۲۰ فیصده کمه شویده.
راپور زیاتوي، په سوریه، پاکستان، افغانستان او ناجیریا کې چې د ترهګرۍ څخه د متاثرو هېوادونو د کتار په سر کې ځای لري ترهګریزې پېښې کمې شویدي.
راپور دا هم وايي، چې که څه هم ترهګریزې پېښې کمې شویدي خو ترهګري د نړۍ نورو برخو ته هم خپره شوېده او دا پدې معنې چې د ترهګرۍ پېښې له ۶۵ هېوادونو څخه اوس ۷۷ هېوادونو کې ترسره شویدي.