د افغانستان پوځ وایي چې د لومړي ځل دپاره یې، د شپې له طرفه، د طالبانو پر سنگرونو باندې هوایي بمبارۍ کړي دي.
د افغانستان د دفاع وزارت ویاند غفور احمد جاوید امریکا غږ افغان سرویس ته وویل چې افغان ځواکونو د یکشبنې/اتوار او دوشنبې/گل په شپو (د ډېسمبر پر ٩مه او ١٠مه) د ارزگان ولایت په مربوطاتو کې د طالبانو سنگرونه، د سوپر تکانو اې ـ ٢٩ ډوله امریکایي جهازونو په وسیله بمباري کړل.
ښاغلي جاوید دا هم وویل چې په دې بریدونو کې طالبانو ته درنه مرگ ژوبله اووښتې ده او د هغو د وسلو انبارونه هم له منځه تللي دي. افغان ځواکونو د دغو بریدونو ویډیو هم خپره کړې ده (د لیکنې په پای کې یې همدلته لیدلای شئ).
د طالبانو سره په جگړه کې افغان پوځیانو په دې وروستیو کلونو کې درنې مرگ ژوبلې گاللي دي، خو اوس افغان پوځ وایي چې د شپې د طرفه د دوی هوایي بریدونه به د افغان عسکرو مرگ ژوبله راکمه کړي.
د افغانستان د دفاع وزارت ویاند وویل چې په نږدې راتلونکې کې به په شپني عملیاتو کې د اېم ډي ٥٣٠ ډوله او د بلک هاک هلیکوپټرو څخه هم کار واخیستل شي. هغه دا هم وویل چې په وروستیو درېیو میاشتو کې د امریکا په مشرۍ نړیوالو ځواکونو، افغان پیلوټانو ته د شپې د طرفه د بمبارۍ کولو مهارت هم ورزده کړی دی.
افغانستان پخوا د پوځ په برخه کې گڼ شمیر روسي جهازونه درلودل، خو وروسته د مجاهدینو او طالبانو په دورو کې د افغانستان هوایي ځواک کمزوری او په نشت کې حساب شو. په دې وروستیو کلونو کې، د افغانستان هوایي ځواکونه د ناټو په مرسته بیرته په پښو دریدلي او ښایي نور هم پسې پیاوړي شي.
