لاس رسیدونکی لینک

Breaking News

د پاکستان په تړاو د جنجالي خبرو پر سر، د افغانستان د خارجه وزارت ویاند لېرې کړی شو


صبغت الله احمدی، د خارجه وزارت گوښه کړی شوی ویاند

د افغانستان ولسمشر محمد اشرف غني د دې هېواد د خارجه چارو وزارت ویاند صبغت الله احمدی په دې دلیل له دندې لیرې کړی چې گني هغه پاکستان ته د طالبانو د استازو د سفر په اړوند داسې خبرې کړې وې چې د افغانستان د حکومت له پالیسیو سره یې اړخ نه لگاوه.

په دې اړه د ولسمشر غني ویاند، صدیق صدیقي پر خپل ټویټر لیکلي چې د صبغت الله احمدي پرځای به پس له دې میرویس ناب د خارجه وزارت نگران ویاند وي. میرویس ناب د خارجه وزارت د اقتصادي همکاریو مرستیال په توگه هم ټاکل شوی دی.

پر دې سربېره، د پژواک خبري اېجنسي لیکلي چې د دوی د معلوماتو پر اساس، صبغت الله احمدي له گوښه کېدو وروسته، څارنوالۍ ته معرفي شوی، یعنې پر خلاف به یې قانوني کاروایي هم کیږي.

صبغت الله احمدي پاکستان ته د طالبانو د مشرانو د وروستي سفر او د پاکستاني چارواکو لخوا د هغو د مېلمه پالنې هرکلی کړی و او ویلي و چې د سولې دپاره افغانستان د هر هېواد د هڅو ملاتړ کوي.

مگر د ولسمشرۍ ماڼۍ ویاند صدیق صدیقي بیا ویلي و چې پاکستان ته د طالبانو د هیئت سفر او بیا د اسلام آباد لخوا د هغو مېلمه پالنه، د هېوادونو ترمنځ د تعلقاتو د اصولو خلاف عملونه و.

احمدي پر دې سربېره، د ارگ چارواکي په دې تورن کړي و چې گني په انتخابي کمپاینونو بوخت دي، خو خارجه وزارت د افغانستان د ملي گټو په رڼا کې پالیسۍ مخته بیایي.

له دې نه علاوه، په دې وروستیو کې چې د ملي امنیت (قامي سلامتیا) سلاکار حمد الله محب په مشرۍ د افغانستان کوم هیئت نیویارک ته راغی او د ملگرو ملتونو په سرمشریزه اسمبله کې یې گډون وکړ، د هغه په هکله هم د افغانستان د خارجه وزارت ویاند داسې بیان ورکړ چې د حکومت سپکاوی گڼل کېده.

صبغت الله احمدي وویل چې "له بده مرغه" سږکال د ملگرو ملتونو په عمومي اسمبله کې د افغانستان برخه اخیستل، "تر ټولو کمزوري" و.

د افغانستان د خارجه چارو نگران وزیر، صلاح الدین رباني دی چې پخواني جهادي ولسمشر برهان الدین رباني زوی دی. داسې ویل کیږي چې د سیاسي اختلافاتو له امله، د صلاح الدین رباني او ولسمشر غني ترمنځ تعلقات ښه ندي.

څه موده مخکې ولسمشر غني په خارجه وزارت کې د فساد د موجودگۍ په هکله یو پلټونکی هیئت هم وټاکه، خو د خارجه چارو نگران وزیر صلاح الدین رباني یاد شوي هیئت ته د پلټنو اجازت ورنکړ.

د افغانستان د خارجه وزارت یو مخکینی ډېپلومات فضل کټوازی وایي چې صبغت الله احمدي د افغانستان د یوې حکومتي ادارې ویاند نه، بلکې د جمعیت اسلامي گوند یو ویاند ته ورته و. هغه زیاتوي چې د خارجه چارو وزارت د یوې ځانگړې ډلې د سیاسي خواهشاتو ښکار پاته دی.

XS
SM
MD
LG