د بنګله ديش حکومتي او پولیس چارواکي وايي په هیواد کې د واکمن ګوند او د مخالف سیاسي ګوندونو د ملاتړو تر منځ نښتو کې لږ تر لږه دوه تنه وژل شوي او یو شمیر نور زخمیان دي.
خو رائټرز خبري ایجنسي د مړو شمیره لس ښايي او لیکي چې د شلو نه زیات نور زخمیان دي.
دغه نښتې د اتوار/یکشنبې په ورځ په داسې کې رامنځته شوې چې په دغه هیواد کي عام انتخابات روان دي. طمعه ده چې د عوامي لیګ سره تعلق لرونکې او موجوده وزیراعظمه شیخ حسینه به په دریم ځل انتخابات وګټي، خو سیاسي مشران د درغلو تورونه لګولي دي.
د بنګله دیش ابادي ١٦٥ ملینه ده او د عام انتخاباتو په اولنې ورځ ډیر لږ خلک د رائي ورکولو لپاره راوتلي وو.
وزیراعظمي په سرښار ډاکه کې د ووټ ورکولو وروسته مطبوعاتو ته وویل چې خلک به د عوامي لیګ انتخابي نشان کښتې ته په حق کې خپل ووټ استعمالوي.
"زما باور دې چې د بنګله دیش خلک به کشتې ته ووټ ورکوي، او مونږ ته به یو بله موقع راکوي چې د دوي خدمت اوکړو او هغه ترقیاتي کارونه جاري اوساتو چې بنګله دیش د ترقي یافته هیوادنو په صف کې شامل کړو".
پخوان وزیراعظمه او د نیشنلسټ ګوند مشره خالده ضیا دا وخت د بډو رشوتو په تور په جیل کې ده او عدالت هغې ته اجازه نده ورکړي چې عام انتخاباتو کې د یو کانديد په توګه برخه واخلي.
په داسې حال کې د حکومت مخالفه ګوندونو د ٨٢ کلن کمال حسین په مشري کې سیاسي اتحاد جوړ کړی. کمال حسین د اکسفورډ یونیورسټي نه د وکالت زدکړی ترلاسه کړي او عوامي لیګ ګوند پخواني غړی وو.
ښاغلې کمال حسین وايي "ما ټولو ته په ټیلي فون ویلي چې ماته شکایتونو تر څنګ تاسو د الیکشن عملې او دهغې اعلي چارواکو او مطبوعاتو ته هم وايي څه چې تاسو لیدلي دي. نوموړی زیاته کړه مونږ هغه ټول شکایتونه راغونډه و او دغه به حکومت او الیکشن کمیشن سره شریک کوو."
داسې رپورټونه هم مخې ته راغلي چې په پولنګ سټیشنو باندې هم یو شمیر خلک ځورول شوي دي.
د هیواد ستر ښار ډاکه کې د موبایل انټرنیټ سهولت تړل شوی او په دغه ښار کې ډیر لږ خلک لیدلې کیږي ولې چې اکثره کسان خپل پلارني کلو ته ووټ استعمال په غرض ورغلي.
