د جي ټونټي د غونډې نه وړاندې د امریکې صدر او د هند وزیراعظم په مشترکه منصوبو خبرې وکړې

د جي ټونټي تنظیم د سر مشرانو په غونډه کې شرکت دپاره د امریکې صدر جوبایډن د جمعې په ورځ‌ نوي دلي ته ورسېدلو او د هندوستان وزیراعظم نرندره مودي سره یې د ټېکنالوجۍ، بنیادي اډاڼې او د جمهوریت په شان په مشترکه منصوبو خبرې وکړې.

د جي ټونټي غونډه د خالي، شنبې، په ورځ په نوي دلي کې شروع کېږي.

د یو مشترکه بیان ترمخه، صدر بایډن او د وزیراعظم نرندره مودي د جمهوري اقدارو او د انساني حقونو په پرمختګ کې او د ټېکنالوجۍ په برخو کې د همکارۍ لوظ وکړو.

د صدر بایډن او د وزیراعظم نرندره مودې د خبرو وروسته د انډو پېسېفېک سیمې د چارو دپاره د امریکې لوړ رتبه چارواکي کرټ کېمپبېل خبریالانو ته وویل دواړه مشران د بنیادي اډاڼي یا انفراسټرکچر سره تړلي د مواصلاتو په لوی پرمختګ کار کوي چې هندوستان به د منځني ځتیځ او یورپ سره وتړي. هغه وویل امکان دی چې په د اړه د خالي، شنبې، په ورځ اعلان وشي.

امریکا، هندوستان او د خلیج ملکونه په سیمه کې د رېل او د بندرونو په یوه منصوبه خبرې کوي چې د چین د بېلټ اېڼد روډ منصوبي متوازي منصوبه ګڼل کېږي.

د جنوبي اېشیا دپاره د امریکې د نېشنل سېکیورټي کاونسل چارواکي اېلین لوباکر وویل په ۲۰۲۴ کې به امریکا او هندوستان په انټرنېشنل سپېس سټېشن، جي فایو او چي شپږ او د مایکرو چېپس په مدونو کې هم همکاري کوي.

بایډن مودي سره د هغه په کور کې ملاقات کولو نو خبریالان په یو بس کې بهر بوتلل شوو چې د هغو خبریالانو دپاره غیر معمولي صورتحال وو چې په امریکا کې او په نورو ملکونو کې په ازاده ډول د امریکايي صدر د ملاقاتونو خبرونه او تصویران خپروي.

د بایډن او د مودي د ملاقات تصویران د هندي وزیراعظم دفتره شایع کړل چې دواړه په کې څنګ په څنګ ناست لیدل کېږي.

د چې ټونټي په سر مشرېزه غونډه کې شرکتونکي د جمعې په ورځ هندوستان ته ورسېدل.

د روس صدر ولادېمیر پوټن او د چین صدر شي جېنپېنګ د نوي دلي په غونډه کې د شرکت نه ډډه کړې ده.
په داسې حال کې چې نړیوال مشران په ډیرو کم موضوعاتو په مکمله توګه اتفاق ته رسېږي،‌ د اوکراین جنګ دا مسله نور هم سنجیده کړې ده.

وزیراعظم نرندره مودي لوظ کړی چې د نولي دلي ناسته به د اوکراین جنګ په متاثره نه کړي او توجه به د پرخته تلونکو ملکونو یا ګلوبل ساوت په مسلو مرکوزه پاتې کېږي.

روس او چین د هغه بیان مسوده رد کړې چې وايي د جي ټونټي زیاتره غړي ملکونه د اوکراین د جنګ سخته غندنه کوي.

یورپين یونین هغه بیان رد کړی چې هندوستان تجوزیر کړی. یورپين یونین ویلي د هندوستان تجویز کړی لهجه ډیره سخته نه ده. د برطانيې وزیراعظم رشي سونک ویلي اراده لري چې په اوکراین د روس د یرغل خلاف سخت دریځ خپلولو په لړ کې د جي ټونټي په ملکونو فشار واچوي.

د اوکراین صدر ولادومیر زیلېنسکي تیر کال په بالي کې د جي تونټي د سرمشرانو غونډې ته وډیو کانفرنس دلارې وېنا کړې وه خو هغه د نوي دلي د غونډې دعوت نه دی ورکړی شوی.

د کېنېډې وزیراعظم جسټن ټروډو زیلېنسکي ته ډاډ ورکړی چې د جي ټونټي په خبرو کې به د اوکراین مسله هم شامله وي. ټروډو په انسټاګرام یو پېغام کې وویل هغه مایوسه شوی چې زېلېنسکي به د نوي دلي په غونډه کې نه وي خو د هغه دپاره به په کلکه خبره کوي.

د جي ټونټي تنظیم بنیاد په ۱۹۹۹ کې اېښودل شوی و چې د نړۍ د اقتصادي مسلو حل راوباسي خو د تنظیم زیات بحث په سیاسي مسلو کېږي چې څېړونکي وايي په سیاسي مسلو د زیاتو بحثونو له امله د جي ټونټي صلاحیت کم شوی چې په موثره توګه کار وکړي.

په جي ټونټي کې د دنیا مالداره ملکونه لکه امریکا، کېنېډا، برطانیه، جاپان، جرمني او د یورپي اتحاد یا یورپین یونین ترڅنګ په کې روس، چین او ځینې نور ملکونه شامل دي.