د امریکې صدر جوبایډن به د ګل، دوشنبې، په ورځ ماسپښین د انډونیشیا صدر جوکو وېدودو سره په وایټ هاوس کې ملاقات کوي او په غزه کې د جنګ په اړه د مسلمان ملکونو د نظر نه به ځان خبروي.
وېدودو دا مهال په واشنګټن کې دی چې امریکې سره سفارتي تعلقات کامپري هېنسیو سټرېټيجېک پارټنرشېب یا د جامع سټرېټيجېک همکارۍ کچې ته ورسوي چې د ملک په سفاتری درجه بندۍ کې تر ټولو لویه درجه ده.
په منځني ختیځ کې د شخړې په اړه د بایډن او د وېدودو په دریځونو کې لوی اختلاف موجود دی. بایډن د اسرایل کلک ملاتړ کوي او ودودو په غزه کې په سمدستي ډول د جنګ بندۍ غوښتنه کوي او د ملګرو ملتونو د هغه کمېشن حمایت کوي چې په اووم اکتوبر په اسرایل دحماس د حملې وروسته د دواړو خواو د ممکنه جنګي جرمونو په اړه شواهد جمع کوي.
وېدودو تېره هفته په سعودي عرب کې د اسلامي ملکونو د همکارۍ تنظیم او ايي سي د غونډې نه پس د بایډن سره ملاقات کوي.
د ۵۷ رکني او ايي سي د سرمشریزې مشترکه اعلامیې په غزه کې خپلې دفاع د حق په څېر په غزه کې د اسرایل اقدامات رد کړي وو او په سمدستي ډول يې د جنګ د ختمېدو غوښتنه کړې وه. په اعلامیه کې غوښتنه شوې وه چې اسرایل ته دې د وسلو خرڅلاو بند کړی شي او بشري امداد ته دې لاس رسی ورکړی شي.
د اتوار، يکشنبې، په ماښام د واشنګټن څخه مطبوعاتو ته په انلاین بڼه بیان کې وېدودو وویل بایډن به د او ايي سي د سرمشرېزې غونډې د قراردادونو نه خبروي. هغه وویل اسرایل ته پکار ده چې د خپلو ظلمونو ذمه واري ومني.
د امریکې د حکومت یو لوړ رتبه چارواکي وي او ای ته وویل صدر بایډن به د صدر وېدودو خبرې په غور اوري چې د سعودي عرب، د نورو عرب او د منځني ختیځ د مشرانو سره د ورستیو خبرو په اړه هغه څه نظر لري.
د امن او جګړې د ختمولو په اړ د امریکې حکومت د منځنۍ او اوږدې مودي په تګلاره کې د اکثریتي مسلمان ملک په حېث د انډونيشیا اواز وزن لري. په انډونیشیا کې ۲۲۹ مېلین مسلمانان دي چې د ملک د ابادۍ ۸۷ فیصد او په ټوله دنیا کې د مسلمانانو ۱۳ فیصد دي.
د ګڼ شمېر نورو اسلامي ملکونو په شان انډونیشیا هم فلسطینیانو سره مرسته کوي چې په کې په غزه کې هسپتال هم شامل دی. د هسپتال منتظیمینو وي او ای ته ویلي د هسپتال چار چاپيره سیمې د اسرایل په هوايي بمبارۍ کې لګېدلي دي او د دوی سره خشاک او د بنیادي ضرورت نور شیان په ختمېدو دي.
واشنګټن ته د وېدودو سرکاري سفر امریکې سره تعلقاتو د بهتر کولو دپاره ترتيب شوی دی ځکه چې د سېپټمبر په میاشت کې بایډن د اسیان غونډې دپاره انډونیشیا ته نه وو تللی او وېت نام ته یې سفر کړی و.
Forum