له افغانستان سره په پوله پرتې د خېبرپښتونخوا په بر جنوبي وزیرستان کې په یو کور کې چاودنه شوې چې پکې د یوې کورنۍ څلور کسان وژل شوي او یو ماشومه ژوبل شوې ده.
ځایي خلک وايي دا ډرون برید وو خو حکومت یې تصدیق یا ترید نه دی کړی .
ځايي حکومتي چارواکي د پېښې تایید کوي او وايي دا پېښه د لدها تحصیل تنګي بدینزۍ سیمه کې شوې او پلټنې یې پیل کړې دي.
د لدها پولیسو تاڼې چارواکو وویل په چاودنه کې د پینځه کسانو خبر ترلاسه شوی چې پکې دوه ښځې او دوه ماشومان هم شامل دي .
د دوی په وینا په اطلاع تر لاسه کېدو سره سم د پېښې ځای ته روان شوي او پلټنې یې پیل کړې دي .
د ژغورنې اداره رېسکیو 1122 وايي د پېښې له ځايه د څلورو کسانو مړي او یوه ماشومه ژوبل حالت کې را ایستل شوي او ژوبل ماشومه په مرګوني حالت کې د علاج د پاره لومړی په سراروغه سیمه کې روغتون وړل شوې خو هلته د اسانتیاو د نيشتوالي له امله 200 کلومیټره لرې ډېره اسماعیل خان سیمه کې پوځي روغتون ته وړل شوې .
ځایي خلک وايي دوي د شپې ناوخته د درنې چاودنې غږ اورېدلی او هغه مهال په هوا کې د ډرون الوتکه لیدل شوې.
د دوي په وينا چاودنه کې بنات مسید د هغه مېرمن، یو لور او تنکی زوی وژل شوی او 14 کلنه یوه لور یې ژوبل شوې
په سیمه کې امنیتي سرچینو ویلي د دوی د مالوماتو له مخې دا یو ای ډي بم چاودنه وه.
د سرچینو وینا ده دا کور د افغان خارجي جنګیالیو تر استعمال لاندې وو چې پکې د دوی د وسله جوړولو کارخانه وه، د وژل شوو کسانو کورنۍ په کرایه ورکړی وو او د شپې پرمهال هغه د وسله والو څخه پاتې شوي پخواني توکي چاودېدلي دي
ځایي خلک وايي د تېرې څه مودې راهسې په هوا کې د ډرون الوتکې لیدل کیږي .
په سیمه کې یو امنیتي چارواکي وویل تنګي بودینزۍ سیمه کې وسله وال خوندي ځالې لري چې ځایی خلک د ډهال په توګه کاروي او د هغوی د څارنې د پاره په هوا کې ډرون الوت کوي. چې کله هم دوی ته په لاس کره استخباراتي مالومات ورځي، په ضد یې عملیات کوي.
د پي ټي ایم فعال او د علاقې ځايي اوسېدونکی عالمزیب مسید وايي دا یو ډرون برید وو او دوی ته د توغندیو ټکړې په لاس ورغلې دي .
هغه وویل په علاقه کې د راه نجات عملیاتو په پایله کې کورونه وران ویجاړ دي او د یخنۍ نه د بچ کېدو دپاره د ټانک ضلعې په ګومل سیمه کې سره د کورنۍ مېشت وو
عالمزیب وویل دوي په ترهګرۍ کې څه لاس نه لري او تېرہ ورځ د ګرمه څخه بیرته خپلې سیمې ته ستانه شوي چې د شپې پرمهال له هوا څخه د دوي په کور توغندي داغل شوې دي.
وي او اې په دې اړه د ضلعې د پولیسو مشر ملک حبیب او د پاکستان د پوځ ویاندې ادارې ای اېس پي ار پېښور څانګې مشر څخه د واټس اېپ د لارې پوښتنه کړې خو تر دې مهال یې څه ځواب نه دی کړی.
تنګي بودینزۍ د لدها تحصیل هغه سیمه ده چې د کال 2009م راه نجات پوځي عملیاتو وروسته د هر قسمه ناامنۍ څخه پاکه ګرځول شوې او د عملیاتو پرمهال بې کوره شوي خلک بیرته ستانه شوي دي.
ځایي خلک وايي د عملیاتو پرمهال یې کورونه وران ویجاړ شوي چې له امله دوی ژمی د صوبې په بندوبستي سیمو کې د کرایه په کورونو کې تېرېږي او په ګرمۍ کې بیرته خپلو سیمو ته ستانه شي.
Forum