په ترکي او شام کې د 7.8 درجې زلزلې دلاسه د مړو کسانو شمېره 6200 ته رسېدلې ده او امدادي کارکونکو په ورانو شویو ودانیو کې خلکو د لټون کوښښونه د نهې، سه شنبې، په ورځ دوامداره وساتل.
د ورلډ هېلت ارګناېزېشن مشر ټيدروس اېدونېم ګېبريېسس په شام او ترکي د زلزله ځپلو خلکو سره د همدردۍ اظهار وکړو.
ټيډروس په جینوا کې یوې غوڼدې ته وویل په جهازونو کې دواړو ملکونو ته طبي سامان لېږل او د بیا رغونې په هلو ځلو کې به د ترکي او د شام مرسته کوي.
هغه زیاته کړه چې دا هغه وخت دی چې انسانیت د اتحاد مظاهره وکړي او ژوندونه بچ کړي.
په ترکي کې چارواکو وویل د 8000 نه زیات کسان ودانو د کنډرونو نه راویستل شوي دي او تر 380000 پورې خلکو چې په زلزله کې يې کورونه زیانمن شوي، په سټېډیمونو، مسجدونو او پا شاپنګ مالونو کې یې پناه اخیستې ده.
د امريکې د جيولوجېکل ادارې ترمخه پرون د ګل/دوشنبې په سهار په ترکي او شام کې د 7.8 شدت زلزله شوې، د 18کلوميټره ژور والي زلزلې سيمه لړزولې وه.
د اېسوسي اېټډ پرېس ترمخه د نړۍ څخه امدادي ټيمونه ترکي ته روان دي چرته چې يواځې د 6000 ودانيو غورځېدو ويل کیږي.
د ترکي د چارواکو په وينا زلزلې لس صوبې ځپلي او هلته د 24000 نه زيات امدادي کار کوونکي په مرستو بوخت دي.
د ترکي چارواکو ويلي د زلزلې نه تراوسه پورې 3381 کسان مړه شوي او د 20000 نه زيات کسان ژوبل شوي دي.
بل لور ته د شام د صحت د محکمې چارواکو ويلي د حکومت د انتظام لاندې علاقو کې769 کسان مړه او د 1400 نه زيات ژوبل شوي او د ياغيانو د ولقې په علاقه کې 450 کسان مړه شوي دي.
د خبري ادارو ترمخه د سخت يخ موسم له امله زلزله ځپلو په خلاصو ځایونو کې شپه تېره کړې ده.
د ترکي صدر رجب طيب اردګان د زلزلې له امله د اووه ورځو د ماتم اعلان کړی دی.
د امریکې صدر جوبايډن د اردګان سره په ټيليفون خبرې کړي او د مرستو وړانديز یې ورته کړی دی. او سپينې ماڼۍ ويلي د مرستو دپاره امريکې ټيمونه هم ورلېږلې دي.
هند، پاکستان او نورو هېوادونو هم ترکي ته مرستې لېږلې دي.
پاکستان ويلي، د وزيراعظم شهباز شريف په لارښوونه ترکي ته د زلزله ځپلو د مرستو دپاره د امداي سامان هوايي الوتکه لېږل شوې چې پکې د ژغورنې 50 کار کوونکي هم لېږل شوي دي.
بل لورته شام په ملګرو ملتونو او غړو هېوادونو غږ کړی چې د زلزلې وروسته په امدادي کارونو کې د شام سره مرسته وکړي.
او د ملګرو ملتونو سيکرټري جنرل انتونيو ګوټېرش ویلي، ملګري ملتونه به په دې مشکل وخت کې د شام هر ډول ممکنه مرستې کوي.
