د امریکې د کانګرس یوه کمېټي به د نهې، سه شنبې، په ورځ افغانستان نه د امریکايي ځواکونو د انخلا وروسته د افغانستان په اړه د صدر جوبایډن د حکومت په تګلاره بحث کوي.
د افغانستان د پخواني حکومت په مهال د پوځ جرنېل سمېع سادات په اېکس، پخواني ټوېټر، ویلي هغه به هم د کانګرس د هاوس اف رېپرېزېنټېټیوز د خارجه چارو کمېټۍ په اورونه کې وېنا کوي.
په افغانستان کې د بیا روغونې دپاره د امریکايي هلو ځلو د څار ادارې سیګار مشر جان ساپکو به هم د هاوس د دغه کمېټۍ په بحث کې شرکت کوي. سيګار په دې اړه اعلان د ګل، دوشنبې، په ورځ په اېکس وېب پاڼه وکړو.
د هاوس د خارجه چارو کمېټۍ په خپله وېب پاڼه ویلي کمېټي به افغانستان نه د انخلا وروسته د افغانستان په اړه د ډېموکرېټېک پارټۍ د صدر بایډن د حکومت تګلارې ته کتنه کوي.
د کمېټۍ مشري د ريپبلېکن پارټۍ د هاوس غړی مایکل مېکال کوي.
ريپبلېکن پارټۍ افغانستان نه د انخلا په اړه د صدر بایډن په تګلاره تنقید کړی دی.
تېرکال مېکال افغانستان نه د انخلا په باره کې د کمېټۍ عبوري رپورټ شایع کړو. رپورټ عنوان دی ای سټرېټيېجک فېلیر اسېسېنګ دي اېډمېنسېټرېشنز افغان وډرال یعنې افغانستان نه د انخلا په اړه د حکومت د سټرېټيجېک ناکامۍ جاج اخیستل.
د کمېټۍ د وېب پاڼې ترمخه د ۱۱۵ صفحو په رپورټ کې افغانستان نه د انخلا په اړه د صدر بایډن د حکومت فېصلو ته په تفصیل کتنه شوې ده چې په نتیجه کې يې د رپورټ ترمخه، طالبانو حکومت واخیستلو او افغانستان نه د امریکايي ځواکونو د راوتلو په مهال ګډوډي او خونریزي رامنځته شوه.
د کمېټۍ د وېب پاڼې ترمخه د عبوري رپورټ د شایع کولو په موقع د نورو خبرو ترڅنګ مېکال وویل افغانستان نه د امریکايي ځواکونو د انخلا په اړه منصوبه بندي نه وه شوې چې په نتیجه کې يې د هغه په قول د امریکې حریفان بیا زړه ور شوي او افغانستان بیا د هغو ترهګرو پناه ځای جوړ شوی چې په امریکا حمله کول غواړي.
صدر بایډن افغانستان نه د امریکايي ځواکونو د ستنولو په اړه د خپلې فېصلې دفاع کړې او د انخلا بهیر يې غیر معمولي کامیابي بللې .
سادات په اېکس په خپل پېغام کې نه دي ویلي چې د نهې، سه شنبې، په ورځ به د کانګرس د کمېټۍ مخې ته وېنا کې زیاته توجه به يې په کومو موضوعاتو وي خو د سږ کال د مارچ په میاشت کې يې په واشنګټن کې د وي او ای ډیوه سره مرکه کې ویلي وو چې د طالبانو په ضد جنګ جاري ساتل غواړي او یقین لري چې د طالبانو حکومت به له منځه ولاړ شي.
سادات، چې د پخواني حکومت په اخېرۍ ورځ یې د کابل د تحفظ ذمه واري په غاړه وه، وویل د صدر اشرف غني حکومت نسکورېدل "پوځي ماتې نه بلکې یوه سیاسي ماتې وه".
Forum