د پاکستان تحريک انصاف ګوند (پي ټي ايي) مشر عمران خان د پاکستان ټاکنو کمېسون په اړوند کړو خبرو باندې بخښنه غوښتې.
عمران خان د خپل ګوند د فنډ يا چندو په اړه د ټاکنو کمېسون رپورټ ته د تعصب نه ډک ويلي ؤ، او د پي ټي ايي پخواني غړي اکبراېس بابر بيا د هغه پر ضد د عدالت د سپکاوي خواست کړی ؤ.
عمران خان نن سره د ملګرو او وکيلانو د ټاکنو کمېسون مشر سردار رضاخان په وړاندې حاضر شوی او د هغه وکيل بابراعوان عدالت ته ويلي دوه وارې يې بخښنه غوښتې ده.
خو عدالت ويلي په ليکلې بڼه دې بخښنه وغوښتی شي او بيا د عمران خان لاسليک کړې غېر مشروط ډول بخښنه عدالت ته وړاندې کړی شوې او هغه ويلي په خپلو خبرو پښېمانه دی.
د ټاکنو کمېسون د عمران بخښنه منلې او د هغه په ضد مقدمه يې ختمه کړې ده.
له دې وړاندې د اکتوبر په ۱۲مه نېټه د ټاکنو کمېسون د عمران د نيولو او کمېسون په وړاندې حاضرولو حکم کړی ؤ، خو د عمران په خواست اسلام اباد هائيکورټ دغه حکم معطل کړی او هغه نن په خپله کمېسون ته حاضر شوی دی.
د فېصلې وروستو عمران خان وويل د هغه د کړو خبرو مطلب دا نه ؤ چې د ټاکنو کمېسون ته يې سپکې ویلي دي، خو د هاغه وخت غبرګون يې دغه ډول ؤ.
په عمران خان پسې د پاکستان مطبوعات او ټيلي ويژن چېنلې د "يو ټرن" یا د (خپلې خبرې نه واپس کېدو) توری کاروي او وخت په وخت پسې هغه زړې خبرې چلوي چې هغه وړاندې کړي او بيا ترې واپس شوی وي.
د بېلګې په توګه د عمران دغه خبره چې هغه ويلي ؤ "خدای دې هغه د شېخ رشيد غوندې کامیاب سیاستدان جوړ نکړي"، هغه ته به يې "بې شرمه او شيده ټلي ويل"،او اوس شېخ رشيد د هغه کلک ملګری دی.
دغه رنګ نوموړي "د کال ۲۰۱۳م د عامو انتخاباتو وروستو د ټاکنو کمېسون او عدليې په انتخاباتو کې کوم کردار ؤ هغې ته د پاکستان د تاريخ شرمناک رول ويلي ؤ".
خو چې کله عدالت وغوښتو نو د هغې وروستو يې ويلي ؤ هغه په خپلو خبرو کې د ريټرنګ افسر نوم اخستی ؤ، او د سترې محکمې په اړه يې څه نه ؤ ویلي.
پاکستان کې د پي ټي ايي مخالف سياستمدار هم په عمران تور لګوي، چې هغه سياست ته سپکې اصطلاګانې راوستې او نه يواځې په عدالتونو بلکې پارلمان پسې هم سپکې خبرې کوي.