د روس د دورې په مهال د هندوستان د خارجه چارو وزیر سوبرامېنین جی شنکر د صدر ولادېمېرپوټن سره ملاقات کړی او ویلي یې دي چې روس او هندوستان په تجارت کې پرمختګ کړی دی.
جی شنکر د دواړو ملکونو په تجارت کې د پرمختګ خبره د شورو، چهارشنبې، په ورځ پوټن سره د ملاقات په موقع وکړه. د روس او هند د تجارت مالیت 50 بېلین ډالرو نه زیات شوی دی.
روس ته د هندي خارجه وزیر د سفر په مهال دواړو ملکونو خپله ملګرتیا، تجارتي او سټرټيجېک همکاري د زیاتولو په موضوعاتو خبرې وکړې.
د روس او هند په تجارت کې د پرمختګ په لړ کې جی شنک وویل د دواړو ملکونو د تجارتي تعلقاتو صلاحیت ښکاره کېدل شروع شوي دي.
هند د روس په لویو اقتصادي همکارانو کې شامل ملک دی او په اوکراین د روس د یرغل وروسته په روس د مغربي ملکونو د پابندیو او د مغربي ملکونو د احتجاجونو باوجود هندوستان روس نه د تېلو درامدات زیات کړي دي.
هندوستان د اوکراین د جنګ په اړه غېر جانبدارانه دریځ اختیار کړی او وايي چې روس یې د لسیزو راهسې ملګری او اتحادي دی.
د روس سرکاري خبري ادارې تاس ترمخه، جی شنکر سره د ملاقات په موقع پوټن وویل چې د روس او هندوستان تجارت پرله پسې په دویم کال هم زیات شوی، په خصوصي توګه د تېلو د درامداتو او د ټېنکنالوجۍ په برخو کې.
پوټن د هند وزیراعظم نرندره مودي ته د ماسکو د دورې بلنه هم ورکړه.
د تېرو شلو کلونو نه زیات وخت راهسې روس او هند هر کال د سر مشرانو غونډه کوي او په اوکراین کې د جنګ نه پس دغه غونډه نه ده شوې.
هند د سرمشریزې غونډې د نه کېدو څه رسمي سبب نه دی ښودلی خو څېړونکي وايي دا د هند د هغو کوښښونو برخه ده چې روس او مغربي ملکونو سره خپلو تعلقاتو کې د احتیاط کار اخلي.
مودي د جون په میاشت کې د امریکې د دورې په مهال په واشنګټن کې د صدر جوبایډن سره ولیدل او دغه ملاقات د دواړو ملکونو په تعلقاتو کې نوی تحریک ګڼل کېږي.
پوټن سره د جی شنکر ملاقات اهم ګڼل کېږي ځکه چې روسي صدر په عمومي توګه د ماسکو په دوره د غېر ملکي خارجه وزیرانو سره ملاقاتونه نه کوي. څېړونکي وايي دا دې خبرې عکاسي هم کوي چې روس په نړیواله سطح یوازې نه دی.
د روس د پینځو ورځو د سفر په مهال جی شنکر د شورو، چهارشنبې، په ورځ د روس خارجه وزیر سرګی لاو رو سره هم ولیدل.
په مشترکه خبري کانفرنس کې لاو رو وویل په پوځي همکارۍ او په مشترکه ډول د جدیدو وسلو د جوړولو په امکان یې هم خبرې وکړې.
د تېرو څو لسیزو راهسې هند په لویه پېماه د روس نه وسلې اخلي او د خپل ضرورت د عسکري ساز او سامان په دریو کې دریمه برخه درامدات د روس نه کوي خو په تېرو څو کلونو کې نوي دلي کوښښ کړی چې په خپلو درامداتو کې تنوع پېدا کړي.
د خپلې دورې په مهال روس سره د هند د تعلقاتو په اړه جی شنکر وویل په نړیوالو تعلقاتو کې روس د هند دپاره یو مستقل عنصر پاتې شوی دی.
د نهې، سه شنبې، په ورځ په ماسکو کې مېشته هندي شهریانو سره ملاقات کې جی شنکر وویل د ایټمي دفاع او خلاف په برخو کې یوازې هغه ملکونه د یو بل سره همکاري کوي چې په یو بل ډیر اعتماد کوي.
Forum