د عراق سرښار بغداد کې داعش د ایس کریمو په یو دکان او د یو حکومتي دفتر سره نژدې بم حملو کې لږ تر لږه ٣١ کسان ووژل.
وړمبۍ حمله د بغداد په کراده نومې برخه کې د ایس کریمو په دکان وشوه چې پکې ١٧ کسان ووژل شو.
څو ساعته ورسته د بغداد په شواکه برخه د یوې حکومتي ادارې د دفتر سره نژدې د موټر بم خلاصیدو له امله ١۴ کسان ووژل شو او ٣٧ نور زخمیان شول.
داعش د دواړو حملو ذمه واري په غاړه واخیسته او وې ویل حملې د ډلې ځانمرگي حمله کونکو وکړې.
په بغداد کې بم چاوندې په داسې حال کې شوي دي چې د ډلې وسله وال د عراق په موصل ښار کې د پسايي سره مخامخ دي. موصل د عراق دویم لوې ښار دی او تیرو څو میاشتو راهسې عراقي او ائتلافي ځواکونه ښار د وسله والو بیرته اخیستلو دپاره په جنگ کې ښکیل دي.
هم د نهې، سه شنبې، په ورځ نا وخته د بغداد شا او خوا په نورو بم چاودنو کې اووه کسان ووژل شو او ١٩ نور زخمیان شول.
په بغداد کې د تشدد پیښې د روژې د میاشت شروع کیدو څو ورځې ورسته شوي دي.
تیر کال هم د بغداد په کراده علاقه کې ځانمرگي حمله شوي وه. په دغه حمله کې ٣٠٠ کسان وژل شوي وو. داعش ددغې حملې ذمه واري هم په غاړه اخیستې وه.