لاس رسیدونکی لینک

Breaking News

د بایډن او پوټین ملاقات – صدر بایډن جینیوا ته ورسېد


د امریکا صدر جو بایډن یورپ ته د خپلې جاري دورې په ترڅ کې، جینیوا ته تللی او د شورو/چهارشنبې په ورځ هلته د روس صدر ولاډمیر پوټین سره ګوري. دا لیدنه په داسې حال کیږي چې د روس او امریکې ترمنځ تعلقات ښه ندي.

مخکې تر دې چې بایډن له پوټین سره خبرو ته کیني، په اېنګلېنډ کې یې د جي-۷ ډلې د مشرانو په اوه څلوېښتمه غونډه کې ګډون وکړ، او بیا یې په براسېلز کې د نېټو او یورپي اتحاد له مشرانو سره وکتل. پوټین سره یې لیدنه، یورپ ته د بایډن د سفر وروستی پلان دی او د ملاقات نه پس به امریکا ته ستنیږي.

صدر بایډن د نهې/سې شنبې په ورځ سمدستي جینیوا ته له رسېدو وروسته، پوټین سره د خپل ملاقات په اړه د یو خبریال پوښتنې ته په ځواب کې وویل: «زه همیشه آماده یم.»

بل اړخ ته د روس صدر ولاډمیر پوټین د اېن بي سي نیوز سره په یوه مرکه کې ویلي چې د روس او امریکا تعلقات دومره اوس خراب شوي چې په دې وروستیو کلونو کې داسې حد ته نه و راټیټ شوي.

وایټ هاوس د خالي/شنبې په ورځ څرګنده کړه چې د روس او امریکې د ولسمشرانو له ملاقات وروسته به صدر جو بایډن یوازې یو پرېس کنفرنس ته خبرې وکړي. د امریکې پخواني صدر جو بایډن چې کله په ۲۰۱۸ کې له صدر پوټین سره په هېلسېنکي کې لیدلي و، د هغه ملاقات نه پس دواړه ولسمشران څنګ ترڅنګ یوځای خبري کنفرنس ته خبرې کړې وې. خو دا ځل به داسې نه وي.

هغه وخت، صدر ټرمپ د خپلو استخباراتي ادارو د وینا خلاف، دا ویلي و چې د پوټین په دې خبره هېڅ شک نه لري چې ویل یې روس د امریکا د ۲۰۱۶ کال په صدارتي انتخاباتو کې مداخلت نه و کړی.

ټرمپ په ۲۰۱۸ کال کې له پوټین سره وکتل او بیا یې یو مشترک خبري کنفرنس کې ګډون وکړ
ټرمپ په ۲۰۱۸ کال کې له پوټین سره وکتل او بیا یې یو مشترک خبري کنفرنس کې ګډون وکړ

د وایټ هاوس یو چارواکي د خالي/شنبې په ورځ وویل: «یو تنهایي پرېس کنفرنس، له آزادو رسنیو سره د صفا خبرو کولو مناسبه طریقه ده چې هغو ته په ملاقات کې د یادو شوو ټکو په اړه واضحه خبرې وشي – دا چې په کومو موضوعاتو مونږ اتفاق کولی شو او کوم موضوعات دي چې مونږ غټې فکرمندۍ ورباندې لرو.»

د امریکا یو جگپوړي چارواکي د نهې/سې شنبې په ورځ خبریالانو ته د توقعاتو په اړه وویل چې بایډن به په دې اړه توضیحات ورکړي: «کله چي هغه سبا د ملاقات نه خلاص شي، نو وبه ګورو چې هغه په دې باب خبرې وکړي.»

د اپرېل په میاشت کې بایډن لس (۱۰) تنه روسي سفارتکاران له امریکا وشړل او د روس په هغو شپږو تېکنالجي کمپنیو یې پابندۍ ولګولې کوم چې د پوټین استخباراتي ادارو سایبري پروګرام یې امداد کول او دا پروګرام د سولاروېنډز په نوم د معلوماتي ټېکنالجي یوې کمپنې هېک کولو کې ښکېل ګڼل کیږي.

په مئې میاشت کې، د امریکا دوه کاروبارونه – کلونیال پایپلاین، چې د امریکا جنوب ختیځو ایالتونو ته تیل انتقالوي، او د غوښو د کاروبار جې بي اېس نومې کمپنۍ – د سایبري یا انټرنېټي حملو ښکار وګرځېدې او داسې باور کیږي چې د دې انټرنېټي بریدونو رېښه په روس کې وه. دغو دواړو امریکایي کمپنیو د خپلو کاروبارونو د بیا بحاله کولو دپاره، څو میلینه ډالره هېکرانو ته ورکړل، که څه هم د امریکا امنیتي ادارو وکړی شول چې د کلونیال پایپلاین کمپنۍ لخوا هېکرانو ته ورکړل شوې پېسې یو څه بېرته هغې کمپنۍ ته وروګرځوي.

وایټ هاوس وایي چې د صدر بایډن او صدر پوټین ملاقات کې به سپینې سپينې خبرې وشي او بایډن به د هغو انټرنېټی حملو خبره راپورته کړي چې ريښه یې روس ګڼل کیږي. همدا راز د اوکراین په وړاندې د کرملېن جارحانه عمل، روس کې د سیاسي مخالفینو بندیوان کېدل، او نور داسې ټکي هم هغه موضوعات دي چې بایډن به يې پوټین ته وریاد کړي.

پوټین د امریکا دا دعوې ردوي چې ګني ماسکو او روسي هېکرانو د امریکا په کمپنیو او ریاستي ادارو کومې انټرنېټي حملې کړي وي.

XS
SM
MD
LG