د لبنان د صحت وزارت ویلي د هېواد په مختلفو برخو کې په مواصلاتي الاتو کې د چاودنو بلې څپې د چارشنبې- شورو په ورځ لږ تر لږه 14 کسان وژلي او 450 نور کسان یې زخمیان کړي دي.
رپورټونه وايي د چاودنو په نوي لړۍ کې هغه الېکټرانېک الات چې د حزب الله وسله وسله وال يې د يو بل سره خبرو دپاره استعمالوي، د شورو، چهارشنبې، په ورځ په هدف کړی شول.
د نهې، سه شنبې، په ورځ د حزب الله په پېجرو کې قریبا ً په یو وخت چاودنو کې تر ۱۲ پورې کسان ووژل شوو او ۲۸۰۰ نور کسان زخمیان شول.
حزب الله او د لبنان حکومت اسرایل د نهې، سه شنبې، د ورځې د چاودنو ذمه وار وبللو خو اسرایل په دې اړه څه نه دي ویلي.
حزب الله د شورو، چهارشنبې، په ورځ وویل د حماس په حمایت کې به د اسرایل خلاف جنګ ته دوام ورکوي او اسرایل دې د سختې سزا انتظار وکړي.
د امریکې خارجه وزیر اېنټني بلېنکن د مصر د دورې په مهال د شورو، چهارشنبې، په ورځ په قاهره کې وویل امریکا نه خو د لبنان په چاودنو کې لاس لري او نه هم يې په دې اړه پېشګي معلومات لرل.
د مصر خارجه وزیر بدر عبدالعاطي سره شریک خبري کانفرس ته بلېنکن وویل د منځني ختیځ په شخړه کې ښکیل فریقېن دې داسې ګامونه نه اخلي چې له امله يې جنګ نور زیات شي.
عبدالعاطي د ترجمه په زریعه خبري ناستې ته وویل مصر د داسې ډول ګامونو غندنه کوي چې د لبنان د خودمختارۍ خلاف ورزي کوي. هغه زیاته کړه چې مونږ د مکمل جنګ په څنډه یوو.
د نهې، سه شنبې، په ورځ په لبنان کې د چاودنو نه څو ګنټې مخکې د اسرایل حکومت اعلان کړی و چې د حماس جلاف د جنګ په اهدافو کې لبنان د پولې سره نږدې سیمو کې جګړې دلاسه بې کور اسرایلیان ستنول هم شامل دي.
د حزب الله مشر حسن نصرالله خپل وسله وال موبایلونو د استعمال نه منع کړي وو، په دې تشویش چې اسرایلي استخبارات به يې د رابطو څارنه کوي.
په تایوان کې مېشته د ګولډ اپالو نومې کمپنۍ باني هېسو چینګ وانګ د شورو، چهارشنبې، په ورځ خبریالانو ته وویل دوی په لبنان کې چاودېدلي پېجرې نه وې جوړې کړې خو په هنګري کې یوې کمپنۍ ته يې اجازت ورکړی و چې د ګولډ اپالو په نوم دغه پېجرې تیارولی شي.
په امریکا او په منځني ختیځ کې د امنیتي چارو ماهرینو د امریکې خبري ادارو ته وویل لبنان ته د لېږل کېدو نه مخکې اسرایلي اېجنټانو دغه پېجرې قبضه کړې وې او په کې چاودېدونکي مواد د شاملولو وروسته پرېښودې.
د یورپين یونین د خارجه تګلارې مشر جوزپ بورېل په لبنان کې صورتحال د پرېشانۍ وړ وبللو او ویې وېل په دې اړه د لبنان خارجه وزیر عبدالله بو حبیب سره خبرې وکړې.
په ماسکو کې د روس د حکومت، کرېملېن، ترجمان دمتري پېسکوف د شورو، چهارشنبې، په ورځ خبریالانو ته وویل په لبنان کې د چاودنو وروسته به په تاوتریخوالي کې یقنن اضافه کېږي.
Forum