د پښتون ژغورنې غورځنګ (پي ټي اېم) سربراه منظور احمد پشتین نن سهار وختي د خیبرپښتونخوا صوبې د پولیسو لخوا په کوهاټ کې ګرفتاره شوی دی. د منظور پشتین د ګرفتاره کېدو خبر اول په سوشل مېډیا باندې خپور شو او وویل شول چې د هغه سره یې څو تنه ملګري هم پولیسو نیولي دي.
وي او اې ډیوه د دې خبرونو د پخلي دپاره د پښتون تحفظ مومنټ یا پښتون ژغورنې غورځنګ له ذرائعو سره رابطه ونیوله او هغو دا خبر تصدیق کړ چې د پي ټي اېم مشر د جاني خېلو پرلت ته د ورتګ پر مهال د پولیسو له خوا نیول شوی دی.
د منظور پشتین د نیول کېدو په ضد، په ټویټر باندې د هغه د خوشې کېدو د مطالبې هشټېګ، ټرینډ ګرځېدلی دی.
د منظور پشتین د نن ورځۍ ګرفتارې وجه تر اوسه نده معلومه او دا به وروسته ښکاره شي چې په کوم کېس کې نیول شوی دی.
د دې خبر نور جزییات به وروسته له تاسو سره شریک کړو.