د ملګروملتونو د کډوالو ادارې، یواېن اېچ سي ار، پاکستان کې وياندې دنيا اسلم خان په وېنا د پاکستان نه څلور مياشتې وروسته نن د افغان کډوالو ۱۹۴ کورنۍ بيرته خپل هیواد ته ستنې شوې.
ډيوه ريډيو سره په خبرو کې دنيا وويل چې پاکستان کې يو اېن اېچ سي ار د رجسټرډ افغان کډوالو بيرته ستنیدو دپاره دوه مرکزونه لري چې يو يې په پیښور او بل په بلوچستان کې دی.
هغې وويل نن د خیبرپښتونخوا نه ۱۹۴ او بلوچستان نه دوه کورنۍ بيرته په خپله مرضۍ ستنې شوي دي، دا د سږ کال وړومبۍ ورځ وه چې بیرته افغان کډوال خپل هیواد ته ستنیدل پیل شو.
تیرې څلور میاشتې د يخ موسم له سببه د کډوالو بيرته تګ ودرول شوی و.
د يُو اېن اېچ سي ار ترمخه تیر کال درې لاکه ۷۰ رجسټرډ افغان کډوال بيرته ستانه شوي او ۱۳ لاکه اوس هم لا په پاکستان کې میشت دي.
راپورونه د افغان چارواکو له قوله وايي چې تیرکال په لویه شمیره کې هغه افغان کډوال هم بيرته راستانه شوي چې رجسټرډ نه و. د غیر رجسټرډ کډوالو شمیره مخې ته نه ده راغلې.
د دنيا په وېنا اداره يې د بیرته ستنیدونکوکډوالو سره مرستې کوي خو د تیر کال په پرتله سږکال يواځې دا بدلون شوی چې تیر کال د يواېن اېچ سي ار لخوا کډالو ته ۴۰۰ ډالره ورکړی کیده او سږ کال د فنډ د کمي له سببه ۲۰۰ ډالره ورکړی کيږي.
د پاکستان نه تیر کال تر ټولو زيات افغان کډوال بيرته ستانه شوي دي دا چې سږ کال به څومره بيرته ستنيږي؟ د دغه پوښتنې په ځواب کې د يو اېن اېچ سي ار وياندې وويل دا به د وخت نه وړاندې ويل وي ځکه نن وړومبۍ ورځ وه .
نوموړې وويل د پاکستان حکومت د فرورۍ په میاشت کې خپله نوي تګ لاره اعلان کړې چې رجسټرډ افغان کډوال د سږ کال د اخیره پورې پاکستان کې پاتې کیدی شي او د دې ترڅنګ د پاکستان حکومت د غیر رجسټرډ افغان کډوالو د رجسټرېشن هم ويلي ؤ او دوي ته يې د کډوالو د قانوني درجې ورکولو ويلي ؤ.
دنيا وويل د پاکستان د حکومت دغه نوې تګ لاره د افغان کډوالو بيرته ستنیدو په عمل اثر کولی شي.
راپورنه د کډوالو له قوله وايي چې بيرته خپل هېواد ته په ستنېدو يې افغانستان کې مرستې نه کيږي، ولې د افغانستان د کډوالو او راستنېدونکو چارو وزارت ویلي چې وړاندې کېدی شي داسې شوي وي ولې اوس د هېواد په شلو صوبو کې د کډوالو دپاره ابادۍ کول په پام کې نيول شوی او تیارئ يې روانې دي.