د جنوبي وزیرستان نه د قومي اسمبلۍ غړي او د پښتون ژغورنې غورځنگ یو مرکزي حمایت کوونکي علي وزیر په اسلام اباد کې د حکومت خلاف "ازادي مارچ" په موقع د جمیعت علما اسلام (ف) مشر مولانا فضل الرحمان د دې غوښتنې هرکلی وکړو چې د ترهگرۍ په شک کې نیول شوي بې درکه کسان دې عدالتونو ته وړاندې کړی شي.
علي وزیر وي او ای ډیوه ته وویل امید کوي چې مولانا فضل الرحمان به د "ټروت اېنډ ریکنسېلیېشن کمېشن" یا د حقایقو معلومولو او د جوړ جاړي دپاره د ډلې جوړولو غوښتنه هم وکړي.
علي وزیر وویل دغه ډله دې په قبایلي سیمو کې د "پاکستان واکمنو چې کوم زیاتی کړی دی بې گناه خلک مړه شوي دي، بې گناه خلک بې کوره شوې دي یا هلته د خلکو سامان او کورونه چې لوټ شوې دي، او بازارونه، چې د هغې هم تحقیقات وشي."
د جی یو ايي (ف) په مشرۍ کې د حکومت خلاف د "ازادي مارچ" برخه والو ته د نهې، سه شنبې، په ماسخوتن وینا کې مولانا فضل الرحمان وویل د ترهگرۍ په شک کې نیول شوي بې درکه کسان دې دپاکستانی شهریانو په حېث عدالتونو ته وړاندې کړی شي چې دا رنگ په ډاگه شي چې څوک ترهگر دی او څوک نا؟
مولانا فضل الرحمان د کومې ادارې نوم وانخیستلو چې گنې دغه بې درکه کسان د چا په ولکه کې دي.
په اسلام اباد کې د تحریک انصاف د حکومت پرضد د مولانا فضل الرحمان او مخالفه ګوندونو د ازادي مارچ احتجاج نن د شورو، چارشنبې په ورځ په اوومه ورځ دوام لري.
په اسلام اباد کې د ډیوه خبريال ارشد مومند خبر راکوي چې بېګاه شپه په اسلام اباد کې باران شوی موسم ورسره يخ شوی خو احتجاج کوونکو د باران نه بچ کېدو دپاره ځینې انتظامات کړي او اوس دوی ځانله خېمې لګوي او د باران نه د بچ کېدو تابيا کوي.
د خو باران باوجود هم احتجاج کوونکي په ځای ناست دي او وايي څو پورې يې چې غوښتنې نه وي منل شوي او مشرانو يې ورته څه نه وي ویلي تر هغې به په احتجاج ناست وي حوصلې يې لوړې دي، هر ډول حالاتو ته تيار دي.
د جمیعت علما اسلام (ف) مشر مولانا فضل الرحمان د نهې، سه شنبې، په شپه د حکومت خلاف د "ازادي مارچ" برخه والو ته خپل تقریر کې ټول سیاسي گوندونه د حکومت خلاف یوځای شوې دي او وزیراعظم عمران خان ته پکار ده چې د ولس غوښتنه ومني او استعفا ورکړي.
مولانا فضل الرحمان وویل په کال ٢٠١۴ کې په اسلام اباد کې د عمران خان د گوند تحریک انصاف ناستې تر ١٢٦ ورځو پورې دوام لرلو خو چا پرې اعتراض نه کولو نو اوس د دوی په احتجج ولې اعتراض کولی شي.
مولانا فضل الرحمان د وزیراعظم عمران خان د حکومت په اقتصادي او خارجي تگلارو سختې نیوکې وکړې او ویې وېل چې د هندوستان سره د پاکستان تعلقات خراب دي، د افغانستان او چین سره د پاکستان تعلقات د بې اعتمادۍ سره مخامخ دي.
د مولانا فضل الرحمان د تقریر په مهال د نورو مشرانو ترڅنگ محمود خان اڅکزۍ او د خېبرپښتونخوا پخوانی اعلا وزیر اکرم خان دراني هم په سټېج ولاړ وو
