د پاکستان پوځ ویلي په شمالي وزیرستان کې وسله والو سره جګړه کې یې دوه عسکر او یو وسله وال وژل شوی دی.
د پوځ د مطبوعاتو څانګې ايي اېس پي ار د ګل، دوشنبې، په ورځ په یو بیان کې وویل د امنیتي ځواکونو او د وسله والو جګړه د خالي، شنبې، په شپه په ميرعلي سیمه کې وشوه.
پوځ وویل دوه عسکر يې وسله والو سره د ډزو په تبادله کې ووژل شوو او پوځ یو وسله وال هم ووژلو.
پوځ وویل په سیمه کې د وسله والو خلاف عملیات دوام لري.
پوځ په خپل بیان کې نه دي ویلي چې امنیتي ځواکونو سره جنګېدونکي وسله وال د کومې ډلې وو خو په وروستیو ورځو کې کالعدم تحریک طالبان پاکستان، ټي ټي پي، په خصوصي توګه په خېبرپښتونخوا او بلوچستان کې د یو شمېر حملو ذمه واري منلې ده.
پوځ په شمالي وزیرستان کې وسله والو سره د جګړې خبر په داسې حال کې ورکړی دی د خېبرپښتونخوا په ډېره اسماعيل خان ضلعه کې د تېلو او ګېسو د کمپنۍ په ساتونکو اېف- سي يا ملېشې اهلکارو وسله والو برید کې يو اهلکار وژل شوی او لږ تر لږه 12 نور ژوبل شوي دي. په يو بل بريد کې يو پوليس اهلکار وژل شوی دی.
د دغه بريد زمه واري تراوسه چا نه ده منلې.
دا په تېره هفته کې دویم برید دی چې د تېلو او ګېس د کمپنۍ په ساتونکو شوی دی، له دې وړاندې په شوي برید کې دوه پوليس اهلکار وژل شوي او درې ژوبل شوي وو. د دغه بريد زمه واري تحریک طالبان پاکستان منلې وه.
په ډېره اسماعيل خان کې د ناامنۍ بله پېښه پرون شوې ده.
ځايي چارواکو ويلي، د ډېره اسماعيل خان د تحصيل کلاچي په لرې پرته ټکواړه علاقه کې نامعلومه وسله والو د جميل شاه په نوم پوليس په هدف کړی دی.
په خېبرپښتونخوا صوبه او خصوصي توګه د صوبې په جنوبي ضلعو کې په وروستيو ورځو کې د ناامنۍ پېښې شوي دي.
Forum