پوځ د بلوچستان په کيچ  ضلعه کې د دوو ترهګرو د وژلو دعوه کړې

د پاکستان پوځ دعوه کړې، د بلوچستان صوبې په کيچ ضلعه کې یې دوه ترهګر وژلي او يو یې ژوبل کړی دی.

پوځ پرون د جمعې په ماسخوتن په خپله وېب پاڼه خپور بيان کې ويلي، د جمعې او زیارت په مينځنۍ شپه کې د استخباراتي معلوماتو په اساس عمليات کړي دي.

ويل شوي، په عملياتو کې دوه ترهګر وژل شوي او يو ژوبل شوی دی.

د وژل شوو ترهګرو پېژندګلو نه ده ښکاره کړی شوې او نه د ژوبل په حواله نور څه ويل شوي دي.

په پوځي بيان کې دعوه شوې د ترهګرو د ولقې نه په لویه کچه وسله ترلاسه شوې ده. پوځ د ترسه کړې وسلې عکسونه هم خپاره کړي دي.

پوځ ويلي وژل شوي کسان د بې ګناه خلکو او امنيتي اهلکارو په وژنه کې ککړ وو.

د پاکستان په بلوچستان صوبه کې په وروستيو کې د ناامنۍ پېښې سېوا شوي دي. په تيرو دوه ورځو کې په کوټه کې د لاسي بمونو د بريدونو پېښې هم شوي دي.

د چهارشنبې په ورځ سي ټي ډي پوليسو په ږوب کې د درېو ترهګرو د وژلو دعوه کړې او ويلي یې وو د وژل شوو ترهګرو تعلق د لاقانونه ګرځول شوې ډلې سره وو.

د جون په 12مه د شپې ناوخته ترهګرو په ږوب کې د پوځ په چاوڼۍ برید کړی،9 پوځیان ورکې وژل شوي او 14 نور ژوبل شوي وو.

پوځ د دغه برید په مهال د پینځو بریدګرو د وژلو دعوه هم کړې وه. د بريد زمه واري د تحریک جهاد پاکستان په نوم ډلې منلې وه.

هم په دغه ورځ ماښام د بلوچستان په سويي علاقه کې په يو بريد کې درې نور پوځيان وژل شوي وو.

پاکستان کې د شخړو او امنیتي مطالعاتو انسټیټیوټ (پي ای سي ايس ايس) تېره میاشت پخپل شپږ میاشتنی رپورټ کې ویلي وو، بلوچستان کې د 2023 م په لومړیو شپږو میاشتو کې د ترهګرۍ 75 پېښې شوې چې ورکې 100 تنه وژل شوي او 163 نور ټپیان شوي دي.

په رپورټ کې ویل شوي وو په بلوچستان کې د کال 2022 پرتله په ترهګریزو بریدونو کې زیاتوالی راغلی دی.