د عمران خان پاکستان تحریک انصاف گوند ویلي چې په مرکز او په پنجاب کې یې د حکومتونو جوړولو دپاره د اسمبلو د غړو مقرره شمېر ترلاسه کړې دي بلخوا د عوامي نېشنل پارټۍ، پاکستان پیپلزپارټۍ، پاکستان مسلم لیگ (ن) او د متحده مجلس عمل استازو ویلي د حزب اختلاف کردار به ادا کوي.
د پي ټي ايي ترجمان فواد چوهدري په اسلام آباد کې د گل، دوشنبې، په ورځ خبریالانو ته وویل په قامي اسمبلۍ کې یې د ٣٢٨ نیغ په نیغه منتخب شوو غړو کې یې د ١٦٨ غړو حمایت ترلاسه کړی دی.
هغه وویل په پنجاب کې هم پي ټي ايي د حکومت جوگه شمېرې ترلاسه کړې دي. په صوبه کې د حکومت جوړولو دپاره د ٢٩٧ نیغ په نیغه منتخب شوو غړو ١۴٩ شمېره پکار ده.
پاکستان مسلم لیگ (ن) په پنجاب کې ١٢٩ او پي ټي ايی ١٢٣ چوکۍ ترلاسه کړې دي.
د پاکستان د ډان ورځپاڼې ترمخه، پي ټي ايي وايي د پنجاب اسمبلۍ ١٣ ازاد منتخب غړو حمایت یې ترلاسه کړی دی.
د خېبر پښتونخوا د اسمبلۍ د ٩٩ نیغ په نیغه منتخب غړو کې پي ټي ايی ٦٥ چوکۍ گټلې دي او حکومت د جوړولو جوگه ده.
بلخوا د عوامي نیشنل پارټۍ، ایم ایم ای، پاکستان مسلم لیگ (ن) او د پاکستان پیپلزپارټۍ د مشرانو یوه غونډه په اسلام اباد کې وشوه.
رپورټونه وايي په غونډه کې برخه اخیستونکو گوندونو فيصله وکړه چې په پارلیمنټ او د پارلیمنټ نه بهر به د حزب اختلاف کردار ادا کوي.
دغه گوندونو خپل دا دریځ تکرار کړو چې د جولايي د ٢٥ نېټې پ انتخاباتو کې درغلي شوي وه.
د غونډې ورسته د پخواني وزیراعظم او د پیپلز پارټۍ یو مهم رهبر یوسف رضا گیلاني وویل په ووټونو کې د غیر ریاستي ادارو مداخلت د غندنې وړ دی. هغه وویل په انتخاباتو کې د درغلۍ خلاف احتجاجونو په خبرونو مطبوعاتي ادارو په ځان خپله بندیزونه لگولې او خبرونه په ازاده توگه نه ورکوي.
د پاکستان مسلم لیگ (ن) راجه ظفرالحق وویل الیکشن کمیشن د انتخاباتو په انتظام کې غېر موثره کردار ادا کړی دی او د ادارې مشر باید چې د خپلې وظیفې څخه استعفا ورکړي.
د ایم ایم ای مولانا فضل الرحمان وویل هغه ادارې دې شرم محسوس کړي چې د ولس رای یې غله کړې دي.
ددغه گوندونو نه علاوه چې د یو مشر هم خپله چوکۍ نه ده گټلې نور څوک په انتخاباتو کې د درغلۍ الزام نه لگوي.
د انتخاباتو ورسته، عمران خان په ټېلې وژن نشر شوي تقریر کې په ووټونو کې درغلۍ خبره رد کړه او وې ویل په دې لړ کې تحقیقاتو ته تیار دی.