لاس رسیدونکی لینک

Breaking News

د پاکستان سترې محکمې په چینايي مالګې باندې بندیز لګولی


د پاکستان سترې محکمې د خالي یا شنبې په ورځ د چینايي مالګې په خرڅلاو، وارداتو او صادراتو باندې بندیز لګولی او ویلي یې دي چې دا مالګه روغتیا ته زیان رسوي.

د پاکستان انګلیسي ژبې ورځپاڼې ډان لیکلي چې د پاکستان ستر قاضي (چیف جسټس) میا ثاقب نثار امر ورکړ چې د محکمې له دغې پرېکړې دې د ټولو صوبو اړوندې ادارې خبرې کړای شي.

ده دا هم وویل چې لومړی وزیر (وزیر اعظم) به پدې مسله په کابینه کې هم خبرې کوي.

د پنجاب چیف سکریټېري چې په محکمه کې حاضر و ستر قاضي میا ثاقب نثار ته وویل، چې د سند حکومت د چینايي مالګې په خرڅلاو باندې د اساسي قانون د ۱۴۴ مادې پر بنسټ بندیز لګولی.

د پنجاب حکومت د چینايي مالګې په خرڅلاو، وارداتو او صادراتو باندې په جنورۍ کې بندیز لګولی و او د خیبر پښتونخوا او سند حکومتونو ورپسې په فیبروۍ کې دغه بندیز پلی کړ.

د امریکا یوې معتبرې ورځپاڼې نیویارک ټایمز د مارچ په لومړۍ نېټه په یوه مضمون کې لیکلي و، چې پاکستاني قاضیان یو ماموریت لري خو پوښتلي وه چې دا ماموریت څه دی؟

د مقالې لیکوال لیکلي و، د پاکستان تر ټولو لوی قاضي هڅه کوي دغه هېواد له مفسدو سیاستوالي وژغوري او په ورته وخت کې غواړي چې مونږ له هارمونونو پاک چرګان وخورو.

لیکوال لیکلي، د پاکستان لوی قاضي په پلازمینې اسلام اباد کې د بار اسوسیشن د کفیټریا مخې ته وکیلانو ته ویلي و:

"زما د هڅو موخه پاکه هوا، اوبه او سوچه شېدې دي. "

نوموړي په دې برخه کې د وکیلانو د مرستې غوښتنه کوله. په ورته وخت کې د هغه په کاري لست کې د ژیړي (هیپټایټیس) او سرطان (کنسر) د ناروغیو پرضد جګړه او غلو دانو ته یوه مناسبه بیه هم ده.

د نیویارک ټایمز د مقالې لیکوال د میا ثاقب نثار له خولې لیکلي و، یو دلیل چې پاکستان لوی قدرت (سوپر پاور) نه دی هغه دا دی چې پاکستاني بزګر یا کروندګر له چینایي بزګرو څخه زیاتې د سګرټ دمې اخلي.

همدارنګه د پاکستان سترې محکمې د فساد په تورونو باندې د ۲۰۱۷ کال په جولای کې د وخت وزیر اعظم نواز شریف هم د خپلې څوکۍ او بیا وروسته حتی د خپل ګوند د مشرۍ لپاره نا اهله وګرځولو چې بیا د ګوند غړو یې د سترې محکمې ددې پرېکړې پر وړاندې خپل مخالفت څرګند کړ.

د نیویارک ټایمز په دغې مقاله کې دا هم ویل شوي وه چې داسې ښاري د پاکستان ستره محکمه هغه مسلې په خپلې اجنډه کې نیسي کومې چې په رسنیو باندې خپریږي او بیا یې په اړه پرېکړې هم بیرته له رسنیو سره شریکې کیږي.

XS
SM
MD
LG