د پاکستان د پوځ مشر جنرل قمر جاوید باجوه د نهې، سه شنبې، په ورځ د روس په رسمي سفر ماسکور ته ورسیدو، دا په داسې مهال چې د امریکې سره په تعلقاتو کې د تاوتریخوالي ورسته اسلام آباد د ماسکو سره رابطې زیاتې کړې دي.
د پاکستان د پوځ د بیان ترمخه، جنرل باجوه ته په ماسکو کې په پوځي مراسمو هرکلی وویل شو او په دې موقع د روس د ځمکني پوځونو مشر د ترهگرۍ خلاف د پاکستان د "کامیابیو" ستاینه وکړه او وې ویل پاکستان یو اهم ملک دی او روس د دواړو هېوادونو پوځي تعلقاتو په پراخولو کې دلچسپي لري.
د پاکستان د پوځ د بیان ترمخه، جنرل باجوه وویل "روس په ورستیو ورځو کې د سیمي د پېچیده حالاتو په هوارولو کې مثبت رول ادا کړی دی." هغه زیاته کړه پاکستان په سیمه کې د کړکېچونو د ختمولو دپاره او د اختلافاتو پرځای د یوالي د لټون دپاره خپل کوښښونه جاري ساتي.
جنرل باجوه په داسې موقع روس ته رسیدلی دی چې واشنگټن سره د اسلام اباد تعلقات ترینگلي شوي دي او د پاکستان او روس د ملي امنيت سلاکارانو په لمړي ځل ليدلي او د دفاع، سايبر امنيت، ايټم او استخباراتي مالوماتو شریکولو سره يې د تجارت په برخه کې د نزدې مرستو په سر خبرې کړي دي.
ماسکو کې د پاکستان د ملي امنيت سلاکار ناصرجنجوعه او روسي فېډرېشن د امنيت د شورا سیکرټري نيکولو پېټراشې په مشرۍ د دواړو هېوادونو د ډلو دوه ورځنۍ ناسته د دوشنبې/ ګل په ورځ پای ته رسېدلې ده.
د غونډې وروستو ويل شوي چې د پاکستان په پلاوي کې لوړ رتبه پوځي چارواکو، سياسي استازو، استخباراتي او د سټرېټجک پلان ډويژن چارواکو چې د ملک د ايټمي وسلو او ميزايل پروګرام څارنه کوي، ګډون درلود.
ويل شوي دواړو غاړو په ليدنه د اطمينان او مثبت پرمختګ لور ته د تګ څرګندونه کړې ده.
سرچينې وي او ای ته ويلي د روس د سوداګرو يو پلاوی هم په روانه اوونۍ کې د پاکستان سفر کوي او دلته په بېلابيلو برخو کې د پانګونې پلان لري.
څيړونکي وايي ماسکو او بيجنګ د واشنګټن او اسلام اباد ترمنځ د رامنځته شوې خلا نيولو او دغه ځای ډکولو هڅه کوي.
اسلام اباد د ماسکو سره د کال ۲۰۱۴م راهسې دوه اړخيزه اړيکې بيرته روانې کړي چې کله د روس د بهرنيو چارو وزیر د پاکستان سفر کړی ؤ.
وروستو د پاکستان او روس ځانګړو ځواکونو په کال ۲۰۱۶م او ۱۷م کې ګډ تمرينونه هم کړي وو.
روس او پاکستان د اربونو ډالرو د توانايۍ په لړ کې خبرې هم کوي، چرته چې چين د وړاندې نه په تيرو درېو کلونو کې په سړکونوجوړولو، رېل په پټړۍ، توانايۍ او سمندري اډو جوړولو په برخه کې ۱۹ اربه ډالره لګولي دي.
بيجينګ ژمنه کړې چې د چين ـ پاکستان اقتصادي راهدارې (سي پېک) په مد کې به د کال ۲۰۳۰ م پورې اندازاً ۶۲اربه ډالره ولګوي.
