د چین او قرغزستان شریکه سرحدي علاقه د نهې، سه شنبې، په ورځ اووه اشاریه یو درجې زلزلې ولړزوله او له امله يې درې کسان مړه شوي او پينځه نور زخمیان شوي دي.
د چین د زلزلې د معلوماتو ادارې وویل په سېنکیانګ صوبه کې د زلزلې مرکزې د ځمکې د سطحې نه ۲۲ کلومېټره لاندې و.
د زلزلې د مرکز نه په ۲۰ کلومېټره لږ تر لږه ۲۰ کلي پراته دي. زلزله په ارومچي، کاشغر، کورلا او یو شمېر نورو سیمو کې محسوس شوه.
د سېنکیانګ د ویغور سیمې سوشل ميډیا اکاونټ وویل په زلزله ځپلي سیمه کې ۴۷ کورونه تباه شول او د ۱۲۰ نه زیاتې ودانیو ته نقصان رسېدلی دی.
د سرکاري مطبوعاتو ترمخه، تر ۱۲۴۰۰ پورې کسان د زلزله ځپلې سیمو نه راوېستل شوي دي او په سیمه کې د زلزلې واړه جړقونه هم محسوس شوي دي.
زلزله د قزاقستان په مرکزي ښار الماتی کې هم محسوس شوه. په سوشل ميډیا شریک کړی شویو وډیوز کې لیدل کېږي چې خلک د ښار لارو کوڅو ته راوتلي دي.
زلزله په قرغزستان کې هم محسوس شوه. د نهې، سه شنبې، د ورځ د سهار راهسې په قرغزستان کې ګڼ شمېر د زلزلې جړکونه محسوس شوي دي. د وروستي جړګ شدت شپږ اشاریه اووه و.
Forum