کرېملېن: صدر پوټن به د وېګنر ګروپ د مشر په جنازه کې شرکت نه کوي

د روس صدر ولادېمير پوټن د وېګنر ګروپ د مشر یوو ګېني پرېګوژېن په جنازه کې د شرکت نه اراده نه لري، دا خبره د روس حکومت یا کرېملېن په داسې حال کې کړې چې فوټانکا نومې خبرې ادارې وویل پرېګوژېن به د نهې، سه شنبې، په ورځ په سېنټ پېټرزبرګ ښار کې خاورو ته سپارل کېږي.

پرېګوژین او د وېګنر ګروپ لس کسان د اګست په ۲۳ نېټه د روس سرښار ماسکو سره نژدې د جهاز د غورځېدو په پېښه کې مړه شوي دي.

د سږ کال د جون په میاشت کې پرېګوژېن په ماسکو کې د صدر پوټن خلاف د بغاوت مشري کړې وه او داسې خبرې هم کېږي چې پوټن د پرېګوژېن په مرګ کې لاس لري.

کرېملېن د پرېګوژېن په مرګ کې د پوټن د ککړتیا خبره ردوي او مکمل دروغ یې بلي.

د اېسوسي اېټېډپرېس خبري ادارې ترمخه، د کرېملېن ترجمان دمتري پېسکوف په دې اړه د څه وېلو نه ډډه وکړه چې د وېګنر عسکري ډلې مشر پرېکوژېن به کله او کوم ځای خاورو ته سپارل کېږي. پېسکوف وویل د یوې کورنۍ په شخصي دستوره تبصره نه شي کولی.

د سېنټ پیټرزبرګ فونټانکا او ځینو نورو خبري ادارو ویلي وو چې ۶۲ کلن پرېګوژېن به د نهې، سه شنبې، په ورځ د ښار په سیرافېمسکوي هادیره کې ښخولی شي، چېرته چې اعلا پوځي خاورو ته سپارل کېږي.

د ای پي د رپورټ ترمخه د پوټن مور او پلار هم په دغه هادیره کې ښخ دي او د نهې، سه شنبې، په ورځ ترې په لویه شمېره کې پولیس ګمارل شوي وو.

د ای پي ترمخه پرېکوژېن په اوکراین د روس د یرغل ملاتړ کړی و او په دې لړ کې ورته اعلا اعزاز ورکړی شوی و.
د کرېملېن د مفاداتو په حمایت کې پرېګوژېن شام، ليبیا، سېنټرل اېفرېکن ريپبلېک او نورو ملکونو د وېګنر ګروپ د کرايې عسکر لېږلي وو.
د می په میاشت کې چې روس چې د اوکراین په بخموت قبضه کوله نو وېګنر ډلې په کې اهم کردار ادا کړی و.

په اوکراین کې د جنګ په اړه د روس د دفاع وزارت د نهې، سه شنبې، په ورځ وویل د روس هوايي دفاعي ځواکونو د اوکراین دوه ډرون د ماسکو په جنوب کې راغورځولي دي.

په تېرو څو هفتو کې اوکراین په باقاعده ډول د روس خلاف ډرون استعمال کړي دي.

یادونه: د دې خبر معلومات د ای پي، روېټرز او ای اېف پي خبر ادارو نه اخیستل شوي دي