روس په هوايي برید کې د اوکراین د بجلۍ اډاڼې زیانمنې کړې او دوه تنه یې ټپیان کړي دي

د اوکراین چارواکي وایي روس نن د شنبې- خالي په شپه ورباندې د میزایلو او ډرون الوتکو په وسیله د بریدونو یوه نوې څپه پیل کړې، چې وایي د هیواد په جنوب ختیځ او لوېدیځ کې یې د انرجۍ اډاڼې زیانمنې کړې او لږ تر لږه دوه د انرجۍ د څانګې کارکوونکي یې ټپیان کړي دي.

د اوکراین هوايي دفاع روانه اوونۍ په دویم لوی برید کې د روس له ور ویشتل شويو 16 میزایلو څخه 12 او ټولې 13 ډرون الوتکې ویشتلې او را غورځولې دي.

د اوکراین د انرجۍ یا ګریډ چلوونکې ادارې یوکرینرګو وایي، په جنوب ختیځ کې په زاپوریژیا او په لوېدیځ کې په «لویو» سیمه کې د بریدونو له امله د دوی د اډاڼو سامان آلات زیانمن شوي دي.

اداره وایي په زاپوریژیا سیمه کې د انرجۍ دوه کارکوونکي ټپیان شوي او روغتون ته وړل شوي دي.

د «یوکرینرګو» ادارې په وینا، دا په تېرو درو میاشتو کې اتم لوی برید دی چې د اوکراین د انرجۍ پر اډاڼو باندې کېږي.

د زاپوریژیا ګورنر ایوان فیډوروو وویل، د روسي برید له کبله په سیمه کې د انرجۍ په یوه بنیادي اډاڼه کې اور لګېدلی او وایي د نورو زیانونو ارزونه روانه ده ځکه چې وایي د ترمیمي څانګې او بیړني ټیم کارکوونکو د برید مقابله وکړه.

فیدوروو د ټیلیګرام له لارې په یو پیغام کې ویلي، "موږ په ډاډ سره ویلای شو، دښمن به ونه ودریږي، ځکه اوکراین د هوایي دفاع سیسټمونو ته اړتیا لري".

ماسکو وايي، د اوکراین د انرجۍ پر اډاڼو یا تنصیباتو یې هوايي بریدونه د روس په خاوره کې د اوکراین د ډرون الوتکو د بریدونو په جواب کې کړي دي.

د «لویو» سیمې ګورنر مېکسیم کوزیڅکي ویلي، 67 اور وژونکو او 12 ځانګړو موټرو یې د پولېنډ پولې ته څېرمه په سیمه کې د لګېدلي اور په وژلو کې برخه اخیستې وه. ګورنر وويل چې په لويو سيمو کې چاته مرګ ژوبله نه ده اوښتې.

د مارچ له میاشتې راهیسې روسي ځواکونو د اوکراین د انرجۍ پر اډاڼو بمباریو ته زور ورکړی، چې له کبله یې ددې هیواد د بجلۍ د پیداوار د وړتیا نیمایي برخه کمه شوې او د انرجۍ سخت بحران یې پیدا کړی دی.

د اوړي له ګرمې هوا سره سره د اوکراین ښارونه د ټاکل شوې انرجۍ له کمښت سره مخ دي ځکه نو له یورپي ګاونډیو څخه یې د بجلۍ وروستلو یا درآمد کولو چاره ریکارډ کچې ته ختلې ده.