د امریکې استخباراتي ادارې سي ايي ای سره د القاعده مشر اوسامه بن لادن په لټون کې د مرستې په لړ کې نیول شوي ډاکټر شکیل افریدي د خپل اووه کاله قید سزا پوره کړې ده. دا خبر د پاکستان ایکسپرېس ټرېبیون ورځپاڼې رپورټ کړی دی.
د ډاکټر شکیل افریدي په اړه ددې تازه خبر نه وړاندې وویل شوي وو چې تیره میاشت هغه د پېښور نه په راولپنډۍ ښار کې زندان ته منتقل کړی شوی دی او دا گنگوسې هم وې چې کیدشي چې ډاکټر شکیل خوشی کړل شي.
ټرېبیون ورځپاڼه وايي د ډاکټر شکیل وکیل د وخت نه وړاندې د هغه د خوشي کیدو امکان نه دی رد کړی.
په کال ٢٠١١ م کې د پاکستان په اېبټ اباد ښار کې د امریکې خصوصي ځواکونو په عملیات د بن لادن د وژل کیدو څو ورځې ورسته پاکستان ډاکټر شکیل افریدي ونیولو.
د نیول کیدو ورسته، نوموړي ته د فرنټر کرائم ریګولېشن یا اېف سي ار قانون لاندې ۲۳ کاله بند اورول شوی ؤ، خو بیا وروستو په کال ۲۰۱۴م کې د هغه وکیل د دغه فېصلې په ضد فاټا ټربیونل کې خواست کړی ؤ چې دې ته دې بیا کتنه وشي.
په کال ٢٠١۴ م کې د ډاکټر شکیل افریدي سزا ١٠ کلونو ته راکمه کړی شوه او په هغه لگول شوي جرمانه هم ١٠ لکه روپۍ کمه شوه.
ټرېبیون ورځپاڼه د ډاکټر شکیل افریدي وکیل قمر ندیم له قوله وايي چې د هغه موکل د قید خپله اووه کاله سزا پوره کړې ده.