د اسرائیل وزیراعظم بېنجمن نېټن یاهو ویلي په دې کې هیڅ شک نشته چې د نړۍ نور هیوادونه به هم لکه د امریکې په رنگ بیت المقدس د اسرائیل د پایه تخت په توگه ومني او چې کله امریکا هلته خپله سفارتخانه منتقل کړي نو نور ملکونه به هم دغه گام پورته کړي.
د زیارت، پنجشنبې، په ورځ په تل ابیب کې په خارجه وزارت کې یوې غونډې ته ښاغلي نېټن یاهو وویل چې د نورو ملکونو سره یې روابط برابر کړې دي چې خپلې سفارتخانې بیت المقدس ته منتقل کړي. هغه د دغه ملکونو نومونه وانخیستل.
اسرائیلي وزیراعظم وویل "زه هیڅ شک نه لرم چې کله د امریکې سفارتخانه بیت المقدس ته منتقل شي، او ممکنه ده چې ددې نه وړاندې هم، بیت المقدس ته به د سفارتخانو د انتقال تحریک شروع شي."
د اسرائیل د وزیراعظم د وینا نه یوه ورځ وړاندې د امریکې صدر ډانلډ ټرمپ په واشنگټن کې بیت المقدس د اسرائیل د پایه تخت په توگه د منلو اعلان وکړو او په دې لړ کې یې په وایټ هاوس کې یو سند هم لاس لیک کړو.
د سعودي عرب، افغانستان او پاکستان په شمول زیاترو اسلامي هیوادونو د صدر ټرمپ د اعلان سخت مخالفت کړی دی.
د ترکي صدر رجب طیب اردوغان ویلي د صدر ټرمپ اعلان منځني ختیځ د "اور غولۍ" ته ورغورځولی دی.
صدر اردوغان وویل "ایی ټرمپه، دا ته د څه کولو کوښښ کی؟ دا څه قسمه دریځ دی؟ سیاسي مشران د انتشا راپارولو پرځای امن قایموي."
د ترکي صدر وویل د صدر ټرمپ د اعلان په نتیجه کې د منځني خیتځ حالات نور هم کړیکچن شي.
د اسرائیل پوځ اعلان کړی دی چې د امریکي د اعلان په ترڅ کې د حالاتو مخنیوي دپاره یې د فلسطین په ویسټ بینک ښار کې د اضافي ځواکونو پرځای کولو فیصله کړې ده.
فلسطینیانو او لکه د اردن په رنگ په منځني ختیځ کې د امریکې اتحادیانو هم صدر ټرمپ د فېصلې سخته غندنه کړې ده.
د امریکايي فېصلې په ترڅ کې د اړي گړي او د امریکا او اسرائیل خلاف د سخت ردعمل د راپاریدلو د خطر په وجه په اسرائیل کې امریکايي شهریانو ته ویل شوي چې په سفر کې دې د احتیاط نه کار اخلي، د یروشلم قدیمې برخې، بیت الحم او جریکو یا اریحا ته د تگ نه دې ډډه وکړي.
