د امریکې د صدر د انتخاب دپاره د شویو ووټونو شمېره دوام لري او د شورو، چهارشنبې، د سحر پورې یو امیدوار هم کره بریا نه وه ترلاسه کړي او د امیدوارانو د کامیابۍ د شپږو ریاستونو په نتېجو اډاڼه وه.
د ریپبلېکن پارټۍ او موجوده صدر ډانلډ ټرمپ او د ډېموکرېټک پارتۍ جوبایډن کې یو د اینده صدر دپاره غوره کوولو دپاره په مېلینونو امریکایانو د نهې، سه شنبې، په ورځ ووټونه ورکړل.
په زیاترو ریاستونو کې د ووټونو نتېجې مخې ته راغلي خو په شپږو کې لا د ووټونو شمېر دوام لري او د صدارتي انتخاب حتمي نتېجه ورته اړتیا لري.
د ووټونو نه پس په مطبوعاتو کې د ووټونو غیر رسمي نتېجې اعلانیږي او د یو یا بل امیدوار د بریا په اړه اندازې لګول کیږي.
خو په انتخاب کې د یو امیدوار د کامیابۍ رسمي فېصله څوک کوي؟
د وي او ای انګریزۍ څانګې دې پوښتنې ته کتنه کړې ده.
په صدارتي انتخاب کې ووټران په مستقیم ډول صدر نه غوره کوي بلکې ووټران الېکټران (منتخب کوونکي) غوره کوي، الیکټران بیا د صدر دپاره رای ورکوي او بیا کانګرس د کامیاب شوي امیدوار اعلان کوي.
دغه عمل د نومبر د دریمې نېټې نه شروع شي او په جنورۍ کې سر ته ورسول شي.
د امریکن یونیورسټۍ د سیاسیاتو او حکومتي تګلارې د مطالعې مرکز ساین انسټېټیوټ اف پالسي انېد پالېټېکس اېمي ډېسي وايي د ووټونو په ورځ الیکټران (منتخب کوونکي) منتخب کړی شي، بیا د ډسمبر په میاشت کې منتخت شوي الیکټران یوځای شي او صدر ته ووټ ورکړي او بیا په جنورۍ کې کانګرس د صدر د انتخاب منظوري ورکړي.
د الیکټرانو تر څنګ د صدر په رسمي اعلان کې د کانګرس د نمایندګانو ایوان یا هاوس اف رېپرېزېنټېټیوز، ایوان بالا یا سنېټ او نېشنل ارکایوز یا د هېواد د تاریخ ساتنې اداره شامله وي.
په سرښار واشنګټن ډي سي او ۵۰ ریاستونو کې ووټونو سره ته د رسېدو نه پس د هر ریاست ګورنر د منتخب شویو الېکټرانو فهرست تیار کړي او بیا دغه فهرست د نېشنل ارکایوز مشر ته ولېږل شي.
د دې نه پس دغه الېکټران د ریاست په مرکز کې جمع شي او صدر او نایب صدر ته ووټونه ورکړي. سږ کال دغه ووټونه د ډسمبر په ۱۴ نېټه کېدونکي دي. په عمومي توګه د الېکټرانو ووټونه باید چې د ډسمبر د دویمې شورو، چهارشنبې، نه پس په لومړي ګل، دوشنبه ، وشي.
د الېکټرانو ووټونه بیا په کانګرس کې شمارل کېږي او کانګرس په رسمي ډول په صدارتي انتخاب کې د کامیاب شوي امیدوار تصدیق کوي.
په موجوده انتخاب کې د کانګرس دغه مرحله د جنورۍ په شپږمه نېټه کېدونکي ده.