امریکا به اوکراین ته د ۴۰۰ مېلین ډالرو مالیت اضافي پوځی امداد ورکوي او پېنګان ویلي اوکراین ته په تازه امداد کې به د هوايي دفاع مزایلې، واړه ډرون او بکتر بند موټرې ورکول کېږي.
د امریکې د دفاع وزارت یا پېنټګان اوکراین سره د تازه پوځې اعلان د نهې، سه شنبې، په ورځ وکړو.
امریکې اوکراین ته د نور پوځي امداد اعلان په داسې حال کې کړی دی چې اوکرایني ځواکونو د روس خلاف جوابي عملیات شروع کړي دي خو رفتار یې د سست روۍ ښکار دی.
د امریکې خارجه وزیر اېنټني بلېنکن وویل امریکايي امداد به د جنګ په مېدان د اوکراین بهادر ځواکونه قوي کړي او روس نه د اوکراین خپلواکه علاقې په بیرته نیولو کې به د اوکرایني عسکرو مرسته وکړي.
بلېنکن په یو بیان کې وویل د اوکراین ولس د روس د جارحیت په ضد د خپل ملک دفاع کوي او د روس بې رحمه حملې اوکراینیان وژني او د غیر پوځي بنیادي سهولتونه تباه کوي.
اوکراین سره د امریکې په نوي امداد کې ګوله بارود، د پېټریاټ نومې هوايي دفاعي نظام مزایلې، سټېنګر مزايلې، د راکټو ګولې، بکتر بند موټرې او نور مختلف قسمه مزایلې او راکټې شاملې دي.
په نوي امداد کې به امریکا په لومړي ځل اوکراین ته د امریکې بلېک هارنېټ نومې د څارنې ډرون جهازونه ورکوي. دا واړه ډرون د استخباراتي معلوماتو راټولولو دپاره استعمالېږی چې وړاندې نورو مغربي ملکونو اوکراین ته ورکړي دي.
د کال ۲۰۲۲ د فېبرورۍ په میاشت کې په اوکراین د روس د یرغل راهسې امریکې اوکراین ته په مجموعي توګه د ۴۳ بېلین ډالرو نه زیات پوځي امداد ورکړی دی.
په عین حال کې د اوکراین هوايي دفاع نظام د ایران جوړ شهید ډرون مخه نیولې چې روس په کییف ور ویشتلي وو. په کییف دا میاشت دا د ډرون شپږمه حمله وه.
بلخوا د روس د دفاع وزارت وویل یو روسي سمندري جهاز د اوکراین هغه دوه سمندري ډرون تباه کړل چې په تور سمندرګي کې یې په روسي سمندري جهاز حمله کړې وه.
د نهې، سه شنبې، په ورځ د روس پارلمېمنټ یو قانون منظور کړو چې له مخې یې په پوځ کې د لازمي بهرتۍ دپاره د عمر حد ۲۷ نه ۳۰ کاله ته زیات کړو. د دغه ګام هدف په اوکراین کې د جنګ دپاره د رېکروټانو تعداد زیاتول دي.
یادونه: د دې خبر معلومات د ای پي، روېترز او ای اېف پي خبري ادارو نه اخیستل شوي دي
