لاس رسیدونکی لینک

Breaking News

کورنی تعلق نه، قابلیت به امریکې د راتگ یا امیگریشن بنیاد وي


ټاکل شوې ده چې صدر ټرمپ به د امیگرېشن یا مهاجرت په اړه د خپل حکومت تگلاره د زیارت، پنجشنبې، په ورځ اعلان کړي

امریکې ته د مهاجرت یا امیگرېشن دپاره صدر ډانلډ ټرمپ د خپل حکومت نوي مجوزه تگلاره اعلان کړه چې ترمخه به یې هېواد ته د خلکو د راتگ دپاره د کورنیو یوځای کېدل نه بلکې د راتلونکو خلکو صلاحیت ته زیاته ترجیح ورکولی شي.

صدر ټرمپ د زیارت، پنجشنبې، په ورځ په وایټ هاوس کې یوې دستورې ته وویل چې امریکې ته په مهاجرت کې به ترجیح د کورني تعلق یا انساني ضرورتونو پرځای د راتلونکو خلکو قابلیت او صلاحیت ته ورکولی شي.

صدر ټرمپ وویل هېواد ته د خلکو راتگ ته دروازې بندوي نه خو ترحیج به د هغو خلکو راتگ ته ورکولی شي چې قابلیت، ماهرت او هنر لري او د امریکې په اقتصاد کې مثبت کردار ادا کولی شي.

د صدر ټرمپ د اعلان نه وړاندې د وایټ هاوس یو چارواکې خبریالانو ته وویل د امیگریشن د مقابلې نوی نظام به په قابلیت اډاڼه وي چې په نتیجه کې به یې د امریکې په سرحدونو امنیت هم بهتر شي.

د امیگرېشن نوی نظام به په امریکا کې په مستقل توگه د اوسېدو اجازت نامو یا گرین کارډونو شمېره هم په زړه کچه ساتي. امریکا هرکال یو اشاریه یو میلین گرین کارډونه جاري کوي. خو د نوي تگلارې ترمخه زیات هنرلرونکو او تعلیم یافته کسانو ته به د گرین کارډ په ورکولو کې ترجیح ورکولی شی په ځای د دې چې امیگرېشن غوښتونکي ته په دې بنیاد گرین کارډ ورکړی شي چې په امریکا کې خپلوان لري.

د موجوده طریقه کار دلاندې ١٢ فیصد خلکو ته د صلاحیت په بنیاد په امریکا کې د مهاجرت یا امیگرېشن اجازت ورکول کیږي. د دې برعکس ٦٦ فیصد خلکو ته د امریکې شهریانو سره د کورني تعلق په بنیاد مهاجرت ورکول کیږی.

د صدر ټرمپ د مجوزه تگلارې دلاندې به ٥٧ فیصد کسانو ته د هغوی د قابلیت او یا په امریکا کې هغوی ته د ورکړل شوي روزگار په بنیاد مهاجرت کولی شي. ٣٣ فیصد خلک به د کورنۍ یا خاندانی تعلق په بنیاد مهاجرت کولی شي او د انساني خواخوږۍ په بنیاد د ویزو شمېره به د ٢٢ فیصد نه ١٠ فیصد ته را کمه کړی شي.

د کورني تعلق پرځای د اقتصاد په بنیا د مهاجرت په اړه څېړونکو پوښتنې راپورته کړې دي.

د کېټو انسټیټیوټ ډېوډ بایر وايي د کورني تعلق په بنیاد چې کوم خلک امریکې ته مهاجرت کوي، د نیمايي نه زیات پکې د کالج ډگرۍ لري چې په امریکا کې د زېږیدلو کسانو نه یې د اعلا تعلیم کچه زیاته ده.

د صدر ډانلډ ټرمپ نوي تگلاره به د ډاایورسټي امیگرېنټ ویزه پروگرام په مکمله توگه ختم کړي چې په عامه توگه د گرین کارډ لاټرۍ په نوم یادیږي. په موجوده وخت کې امریکا هر کال ٥٠٠٠٠ د هغو هېوادونو خلکو ته گرین کارډونه ورکوي چې امریکې ته یې د مهاجرت کچه ټیټه ده.

حکومتي چارواکي د مهاجرت نوي تگلاره د "بلډ امریکا ویزه" په نوم یادوي چې درې بنیادي ټکي لري، یعنی امریکې ته راتلونکي خلک دې بې مثاله هنر، څانگړی مهارت او طالب علمان دې بې مثاله قابلیت ولري.

د دې نه علاوه د مهاجرت غوښتونکو د انگریزۍ د زدکړې کچه به هم کتل کیږي.

د حکومت یو چارواکي وویل ژبه زدکول نه یوازې امریکې ته د راتلونکو خلکو د اقتصادي پرختگ بلکې د هغوي د بچو د سوکالۍ دپاره هم ډیره ضروري خبره ده.

خو ځینې څیړونکې دې خبرې سره اتفاق نه کوي او وايي د دې په نتیجه کې به ډاایورسټي یا په امریکا کې د مختلفو قامونو خلکو د ابادولو هدف متاثره شوي.

او د کېټو انسټیټیوټ ډیوډ بایر وايي د مهاجرت دپاره د قابلیت د نظام دلاندې به د نورو په مقابل کې لکه د چین او هندوستان په رنگ د پرمخته تلونکو هېوادونو زیات خلک امریکې ته مهاجرت کولی شي.

د صدر ټرمپ د مهاجرت مجوزه تگلاره د مامورینو یوې ډلې تیاره کړې ده چې مشرۍ یې د هغه زوم او صلاحکار جېریډ کوشنر کوي. په دغه تگلاره کې ډریمرز نه دي شامل. ډریمرز په امریکا کې مېشته هغه کسان دي چې په ماشوم والي کې د مور او پلار سره امریکې ته په غیر قانوني توگه راغلي دي خو شهریت یې دی ترلاسه کړی.

د پخواني صدر براک اوباما په حکومت کې ډریمرز ته په امریکا کې د پاتې کېدو اجازت ورکړی شوی وو په دې امید چې که څوک په سنگینو جرمونو کې نه وي ککړ نو بالاخر به ورته شهریت ورکړی شي.

XS
SM
MD
LG