لاس رسیدونکی لینک

Breaking News

ټرمپ امر وکړ چې نېشنل ګارډ ځواکونه دې له سرښار واشنګټنه ووځي


د امریکا صدر ډونالډ ټرمپ د اتوار/یکشنبې په ورځ نېشنل ګارډ ځواکونو ته چې د تېرې هفتې د پراخو مظاهرو د کنټرول دپاره سرښار واشنګټن ډي سي ته راغوښتل شوي و، بېرته د ستنېدو امر وکړ او ویې ویل چې د امریکا په سرښار کې اوس حالات په پوره توګه په قابو کې دي.

صدر ټرمپ په خپل ټویټر ولیکل: "دوی (نشنل گارډ) به بېرته خپلو کورنو ته ولاړ شي، خو که ضرورت پېښ شي نو فوري بېرته راستنېدلی شي. بېګا شپه د مظاهره چیانو شمېر، تر هغه چې اټکل یي کېده، ډېر زیات کم و."

که څه هم ډونالډ ټرمپ له سرښار څخه د نشنل ګارډ د وتلو امر وکړ، خو بیا هم د امریکا د پوځ پخوانیو مشرانو د ټرمپ د یوې خبرې پر خلاف خپلو اعتراضونو ته دوام ورکړ. هغه خبره دا وه چې ګني ولسمشر ټرمپ ګواښ کړی و چې د مظاهره چیانو خلاف د واشنګټن ډي سي د ځایي پولیسو ملاتړ ته به تر لسو زرو پورې برحاله فوجیان راوغواړي. د امریکا وروستۍ مظاهرې چې د اتوار/یکشنبې په ورځ یې سمه ورځ وه، د یو سپین پوستکي پولیس په ولکه کې د یو تورپوستکی د مړه کېدو په احتجاج کې پیلې شوي دي.

هغه تورپوستکی چې جورج فلایډ نومېده، د میني سوټا ایالت په مینیاپلېس ښار کې د پولیسو د ګونډې لاندې مړ شوی و چې هغه پولیس بیا وروسته ونیول شو او اوس د دویمې درجې قتل مقدمه پرې روانه ده.

په تېرو دوو ورځو کې په سرښار واشنګټن ډي سي کې مظاهرې پرامنه وې
په تېرو دوو ورځو کې په سرښار واشنګټن ډي سي کې مظاهرې پرامنه وې
وایټ هاوس ته څېرمه راغونډ شوي احتجاج کوونکي
وایټ هاوس ته څېرمه راغونډ شوي احتجاج کوونکي

احتجاجي مظاهرې له څو ورځو راهیسي د امریکا په مختلفو ښارونو کې دوام لري. د اتوار/یکشنبې په ورځ هم سلګونه تنان په سرښار واشنګټن کې د وایټ هاوس مخې ته پرامنه مظاهره وکړه.

د ورځې په سر کې، د امریکا صدر ډونالډ ټرمپ په ټویټر باندې ولیکل چې د شنبې یا خالي ورځې مظاهرې پرامنه وې، نو له همدې کبله هغه له سرښاره د نېشنل ګارډ د پنځه زره عسکرو د بېرته وتلو امر کوي.

د خالي/شنبې په ورځ څه د پاسه لس زره کسانو په واشنګټن ډي سي کې پرامنه مظاهره وکړه، او د یکشنبې یا اتوار په ورځ هم کومه نارامي یا بلوا ونه لیدل شوه. د واشنګټن ښارواله وایي چې د خالي په ورځ هېڅ کوم احتجاج کوونکي نه دی ګرفتاره شوی. خو هغې د صدر ټرمپ په انتظامیې تنقید وکړ چې ولې یې د نېشنل ګارډ عسکر او فډرال پولیس ښار ته دننه کړي و.

هغې وویل چې دا پر واشنګټن ښار باندې یو یرغل و.

په سرښار واشنګټن کې د مظاهره چیانو د کنټرول دپاره، پوځي پولیس هم ځای پر ځای شوي و
په سرښار واشنګټن کې د مظاهره چیانو د کنټرول دپاره، پوځي پولیس هم ځای پر ځای شوي و

قریب دوه هفتې وشوې چې د امریکا په مختلفو ښارونو کې مظاهرې روانې دي. په ځینو دغو مظاهرو کې تشدد هم مخې ته راغلی دی. دا مظاهرې په تېرو ورځو کې دومره پراخې وې چې د ۱۹۶۰ کلونو د ویټنام جنګ راهیسي یې ساری په امریکا کې نه و لیدل شوی.

په همدې لړ کې د امریکا نه بهر هم په یو شمېر ښارونو کې د تفریقي چلند پرضد مظاهرې وشوې. په لندن کې هم مظاهره وشوه او د شنبې یا خالي په ورځ په تشدد واووښتله، ځکه احتجاج کوونکي له پولیس سره په شخړه کې ښکېل شول.

د فرانس په مارسي ښار کې هم څه باندې دوه زره کسان د یوې پرامنه مظاهرې دپاره راغونډ شوي و، خو بیا هلته هم د احتجاج کوونکو او پولیسو ترمنځ اخ و ډب رامنځ ته شو او پولیسو اوښکې بهوونکی ګېس او د مرچکیو سپرې استعمال کړل.

XS
SM
MD
LG