په داسې حال کې چې په غزه کې د زرګونو خلکو د وژل کېدو په سر اسرایل ته د امریکې د وسلو ورکولو څارنه زیاته شوې ، د امریکې د صدر جوبایډن حکومت داسې څه څرګندونه نه ده کړې چې اسرایل ته د وسلو په خرڅولو به قدغنونه ولګوي او په غزه کې د وژل شویو امدادي کارکوونکو جسدونه خپلو ملکونو ته د لېږلو دپاره مصر ته منتقل کړی شوي دي.
په امریکا کې مېشته، د غېر حکومتي امدادي تنظیم ورلډ سېنټرل کېچن اووه غړي د ګل، دوشنبې، په ورځ په غزه کې په هوايي بمبارۍ کې وژل شوي دي. د ملګرو ملتونو مشر اېنټونیوګوټېرېس د پېښې په اړه ویلي چې په کوم انداز کې چې دا جنګ کېږي هم داسې ډول نتیجې به مخې ته راځي.
د امریکې صدر جوبایډن د نهې، سه شنبې، په ورځ په یو بیان کې وویل دغه وژنو يې زړه مات کړی. د حماس خلاف جنګ کې د اسرایل په چلند دا د بایډن تازه تنقید دی.
اسرایل ویلي په کومه حمله کې چې امدادي کارکوونکي وژل شوي، قصداً نه ده شوې او په اړه به يې تحقیقات کولی شي.
د شورو، چهارشنبې، په ورځ په دې اړه پوښتنې نظر انداز کړې چې ایا امریکا به اسرایل سره په پوځي امداد شرطونه لګوي. د هغه مرستیالانو څرګنده کړې چې د دغه ګام امکان نشته، او پام لرنه یې دې خبرې ته کړې ده د حماس د خطر په ترڅ کې امریکا د اسرایل د خپلې دفاع د حق حمایت کوي.
د وایټ هاوس د نېشنل سېکیورټي کاونسل یا د قومي سلامتیا د شورا ترجمان جان کربي د شورو، چهارشنبې، په ورځ خبریالانو ته وویل امریکا به د امدادي کارکوونکو د وژل کېدو په اړه د اسرایل د تحقیقاتو انتظار کوي او د وخت نه مخکې به په کومه فېصله خبره و نه کړي.
امکان دی چې صدر بایډن د زیارت، پنجشنبې، په ورځ د اسرایلي وزیراعظم بېنجمن نېټن یاهو سره په ټېلې فون خبرې وکړي. دا خبره هغه امریکايي چارواکو کړې چې د بایډن او د نېټن یاهو د خبرو دپاره تیاری کوي.
د ګل، دوشنبې، په ورځ د حملې په ترڅ کې په جنګ کې د اسرایل په چلند د امریکې اندېښمني په زیاتېدو ده.
د شورو، چهارشنبې، په ورځ د ورلډ سېنټرل کېچن باني هوزی اېنډرېس روېټرز خبري ادارې سره مرکه کې په اسرایل د امدادي ادارې د موټرو په قافله د حملې الزام ولګولو. هغه وویل په "منظمه" ډول په قافله کې د یو نه پس بل موټر په هدف شوی دی.
هغه وویل د امدادي ادارې کارکوونکو د حرکت په اړه يې د اسرایلي پوځ سره رابطه قایمه کړې وه.
د صدر بایډن د واکمن ډېموکرېټېک پارټۍ سېنېټر برني سېنډرز د نهې، سه شنبې، په ورځ په سوشل ميډیا یو پوسټ کې وویل په تېرو شپږ میاشتو کې اسرایل د ۲۰۰ نه زیات امدادي کارکوونکي وژلي دي او "دا حادثه نه ده." هغه غوښتنه وکړه چې د اسرایل د "جنګ د مشین" نوره مرسته دې و نه کړی شي.
امریکا اسرایل ته هرکال قریباً د څلور بېلین ډالرو امداد ورکوي چې زیاتره پوځ مرسته وي. د قانون ترمخه، د امریکې حکومت که د ۲۵ مېلین نه زیات امداد اسرایل ته ورکوي نو کانګرس په خبروي. د ډسمبر په میاشت کې د امریکې خارجه وزیر اېنټني بلېنکن اسرایل د کانګرس د تاید نه بغیر دوه ځله اسرایل ته په بېړني ډول د وسلو ورکولو منظوري ورکړه.
په اووم اکتوبر په اسرایل د حماس د حملې وروسته امریکې اسرایل ته دوه ځله نوره وسله ورکړې ده. دا خبره جاش پال کړې چې د امریکې په خارجه وزارت، سټېټ ډپارټمنټ کې د وسلې د انتقالولو په څانګه کې ډرېکټر و. د اکتوبر په میاشت کې هغه اسرایل ته د دوامداره مهلک امداد په سر احتجاج کې د خپلې چوکۍ نه استعفا ورکړه.
په کال ۱۰۴۸ کې د صدر هېري ټرو مېن د اسرایل تسلیمولو راهسې ټولو امریکايي صدرانو د اسرایل حمایت کړی دی.
د پخواني صدر جورج اېچ ډبلیو اېچ بش نه علاوه ټولو امریکايي صدرانو بغیر د څه د اسرایل حمایت کړی دی. په ۱۹۹۱ کې صدر بش اسرایل ته خبرداری ورکړو چې په فلسطیني علاقو کې دي د یهودیانو نوي اباد کاري دې منجمد کړي که نه وي نو امریکا به ورته د ۱۰ بېلین ډالرو امداد نه ورکوي. دغه دریځ کار وکړو خو ټول خلک په دې متفق دي چې قدغنونه د اسرایل په دریځ کې تبدیلي نه شي کولی.
Forum