د امریکې دفاع وزارت د رسنیو هغه راپورونه رد کړي چې ګواکی په سومالیه کې د خپلو پوځي عملیاتونو د کمولو پلان لري.
د پنټاګان ویاند نیوي کمانډر کنډیس ټریش امریکا غږ ته د جمعې په ورځ وویل: په وروستیو کې په سومالیه کې د امریکې د عملیاتو په پالیسۍ کې هیڅ شان بدلون نه دې راغلې او د امریکې حکومت به د سومالیې سره خپلو مرستو ته دوام ورکوي تر څو د الشباب ډله له منځه یوسي.
د (ان بي سي) خبرې ادارې د جمعې په ورځ راپور ورکړې وو چې امریکا پلان لري سومالیې کې خپل عملیات کم کړي ځکه چې هغوي په بریالیتوب سره توانیدلي چې د وسله والو ډلو ګڼ شمېر مشران په هواې بریدونو کې په نخښه کړې او له منځه یوسي.
د امریکا د پوځ په مشرۍ د کال ۲۰۱۹ لومړۍ هوايي برید د جنوري میاشتې په دویمه نیټه ترسره شو په کوم کې چې د الشباب ډله په نخښه کړې وه، تر څو په سیمه کې په نوموړې شبکې فشار زیات کړي.
پڼټګان ویلي ، امریکا په کال ۲۰۱۸ کې د الشباب ډلې پر ضد شاوخوا ۴۷ هوايي بریدونه کړي. په کال۲۰۱۷ کې ۳۵ او ۲۰۱۶ کې ۱۵ هواي بریدونه کړي د کوم له مخه چې په کال ۲۰۱۸ کې د بریدونو شمېر تر ټولو زیات دی.
د امریکې پوځي چارواکي وايی دا مهال په سوماليې کې د الشباب ډلې له ۳۰۰۰ څخه تر ۷۰۰۰ په شمېر او د داعش ډلې شاوخوا ۲۵۰ وسله وال دي.
سوماليې کې دا وخت د امریکې د دفاع وزارت لږترلږه ۵۰۰ پوځي کارکوونکي مېشت دي.