د افغانستان دپاره د پاکستان ځانګړي استازي ویلي، د طالبانو د سياسي دفتر پلاوی چې د اسلام اباد په سفر دی، دا سفر د پاکستان د هغه پاليسي برخه ده چې فريقېن یې د لارې د سولې خبرو ته ورسي.
محمد صادق په ټویټر ویلي،
"د ملا عبدالغني برادر په مشرۍ د طالبانو د سياسي کمېشن پلاوی د 16م دسمبر نه تر 18م دسمبر پورې د پاکستان په سفر دی، او دا پلاوی به د وزيراعظم او بهرنیو چارو وزير سره ویني".
هغه په بل ټویټ کې ویلي،
"دا سفر د پاکستان د هغه پالیسۍ برخه ده چې مهم افغان اړخونه د سولې خبرو ته ورسي کومې خبرې ته په تېر ستمبر کې په دوحه کې پېل شوې وې. پاکستان په افغانستان او سيمه کې د تلپاتې سولې د سياسي جوړ جاړي، ثبات او خوشالۍ دپاره پراخه ملاتړ کوي".
The visit is part of Pakistan’s policy to reach out to key Afghan parties in peace negotiations that commenced in Doha last September. Pakistan supports broad-based and comprehensive political settlement for durable peace, stability and prosperity in Afghanistan and the region.
— Mohammad Sadiq (@AmbassadorSadiq) December 16, 2020
د طالبانو پلاوي په داسې حال کې د پاکستان سفر کړی چې د ګل/ دوشنبې په ورځ د افغانستان د سولې د خبرو دپاره د امريکا ځانګړي استازي زلمي خليلزاد او په افغانستان کې د امریکايي او بهرنيو ځواکونو مشر جنرل سکاټ میلر د اسلام اباد سفر کړی ؤ او د پاکستان د پوځ د مشر جنرل قمر جاوېد باجوه او د استخباراتي ادارې د مشر جنرل فېض حميد سره یې ليدلي د افغانستان د سولې د عمل او امنيت په سر يې ورسره خبرې اترې کړې وې.
د طالبانو د پلاوي د پاکستان د سفر په اړه په قطر کې د طالبانو د سياسي دفتر وياند ویلي، د ملا برادر اخند په مشرۍ پلاوی به نن د شورو/ چارشنبې په ورځ د پاکستان د وزیراعظم عمران خان او بهرنیو چارو د وزير سره ویني.
محمد نعيم ويلي د طالبانو پلاوی به د پاکستان د وزیراعظم عمران خان او د بهرنيو چارو وزير شاه محمود قرېشي سره په ليدنو کې د دواړو هېوادونو د اړونده موضوعاتو او په ځانګړي ډول د مهاجرينو د ستونزو، د پاکستان سره د افغانانو د تګ راتګ او افغان سوداګرو په ستونزو خبرې وکړي.
په قطر کې د طالبانو د سياسي دفتر پلاوی په داسې حال کې د پاکستان سفر کوي چې د طالبانو او افغان حکومت د مذاکراتي ډلو ترمنځ په بېن الافغاني خبرو کې د 20 ورځو وقفه شوې او ویل شوي په 5م جنورۍ 2021م به دغه خبرې بيرته روانيږي.
له دې وړاندې هم د روان کال د اګست په مياشت کې د ملا برادر په مشرۍ پلاوي د پاکستان سفر کړی ؤ.