واشنګټن – د جرمني د روغتیا وزیر کارل لوټرباخ د جمعې په ورځ خبریالانو ته وویل، دی فکر کوي چې د کورونا د اومېکران ډول له امله به د کورونا پنځمه ستره څپه راځي.
نوموړي دغه څرګندونې د جرمني په شمالي ایالت سسوني کې د واکسین له یو مرکز څخه د لیدنې پر وخت په یوې خبري غونډه کې کړي.
لوټرباخ چې د اپیډیمالوژۍ پخوانی پروفیسر دی وویل، دی په برتانیه کې له خپلو همکارانو سره له نېږدې په اړیکه کې دی او هغوی وايي، د اومېکران خپرېدل به تر ټولو هغو زیات وي چې تر اوسه مونږ په دې وبا کې لیدلي دي.
د جرمني د روغتیا وزیر وړاندې وویل، چې جرمني باید داسې یو چلنج ته تیاری ونیسي چې لا تر اوسه ورسره په دې ډول کې نه یو مخامخ شوي.
د جرمني د روغتیا وزیر کارل لوټرباخ
ده دا هم وویل، دا چې اومېکران به نسبتا خفیفه ناروغي رامنځته کوي کوم فرق نه راولي ځکه د اومېکران په چټکۍ سره د خپرېدو توان به هغه ګټه لاندې کړي چې خفیفه ناروغي راولي.
لوټرباخ وویل، دی ګومان نه کوي د اومېکران د څپې مخنیوی دې وشي او له همدې امله به دا زمونږ روغتونونو، بیړنیو خونو او په ټوله کې ټولنې ته یو لوی چلنج وي.
خو هغه وویل، د واکسین دریم ډوز یا بوسټر شات یواځینۍ ريښتینې لاره ده چې د اومېکران د شدید حالت څخه مخنیوی کولای شي.
هغه د زیارت یا پنجشنبې په ورځ وویل، چې د واکسینونو اخېستلو تېزول او د بوسټر ډوزونو اخېستل د کورونا پرضد د دغه د سټراټېژۍ مرکزي ټکي دي او دی به له نورو هېوادونو سره هم اړیکه ونیسي چې د واکسین زیات ډوزونه ترلاسه کړي.
جرمني د کورونا د پېښو د یو ځل بیا زیاتوالي له امله روغتیايي بندیزونه بېرته ولګول او هغه کسان چې واکسین شوي نه دي هغوی یې له رسټورانټونو او غیر ضروري تجارتونو څخه منعه کړل.
په جرمني کې د رابړټ کوخ انسټېټیوټ د جمعې په ورځ خبر ورکړ چې په تېرو ۲۴ ساعتونو کې د کورونا ۵۰۹۶۸ نوې پېښې موندل شوې دي.