واشنګټن ــــ د اوکراین په پایتخت کيوف کې مېشته خبریاله وایره هایریک روسي جنګي جازونو په ودانیو باندې د بمبارۍ په وخت وژلې ده.
په ودانیو د روسي میزايل لګېدو په اړه د رېډیو فري یورپ اوکراین څانګې د خبر خپرېدو وروسته د ملبې لاندې د اپریل په ۲۹مه د خبریالې هایريک مړی موندل شوی.
د اپریل په ۲۸مه د ملګرو ملتونو عمومي مشر انتونيو ګوتېریش د کیف په سفر وو چې په هوایي بمبارۍ کې پایتخت هدف شو او په اپارټمنټونو میزایلونه ګوزار کړی شوي.
په وېډیوګانو او عکسونو کې ښکاري چې د ودانۍ لاندینی منزل زیات زیانمن شوی او په شاوخوا سیمو کې د موټرو شیشې ماتې شوې دي.
د روس د دفاع وزارت ویاند ایګور کوناشینکو دعوه کړې د اپریل په ۲۸مه تر اوږدې فاصلې پورې هدف ویشتونکي میزایل بېخي رسا په کیف کې د یوې فیکټرۍ هغه ودانۍ په هدف کړې چې پکې د اوکراین ارټیم راکټونه جوړیږي.
د اوکراین چارواکو تر اوسه په دغه برید کې د فیکټرۍ د لګېدو په اړه څه نه دي ويلي. د کيف ښاروال ویټالي کلیشکو د اپریل په ۲۹مه په ټيلیګرام ويلي په برید کې د هدف شوې ودانۍ نه یو مړی او لس ژوبل کسان ژغورل شوي دي. نور کوم تفصیل یې نه دی ويلی.
مېرمن هایریک په کال 1967 کې زیږیدلې وه او د کال 2018 نه یې رېډیو فري یورپ سره کار شورو کړی وو. تر دې وړاندې یې په اوکراین کې د لویو ټي وي چېنلو سره دنده تر سره کړې وه.