واشنګټن ـــــ د پیسو د غیرقانوني لېږدولو او د ترهګرۍ د مالي سرچینو د څار نړیوالې ادارې (ایف اې ټي ایف) نن د جمعې په ورځ پاکستان د هغو هېوادونو له خړ نوملړه و ایست چې تر زیاتې څارنې لاندې وو.
په پېرس کې تر غونډې وروسته د ایف اې ټي ایف ادارې مشر راجا کمار خبري غونډې ته وویل، چې پاکستان له 2018م کال راهیسې د دوی په خړ فهرست کې وو او نن ترې و ایستل شو:
"دا په یو وخت باندې دوه کاري پلانونه لري، د پاکستاني چارواکو له خوا تر ډېر کار وروسته دوی په اېکشن پلان کې شامل زیاتې سپارښتنې عملي کړې دي".
د ایف اې ټي ایف مشر وویل ادارې یې د اګست میاشتې په اخر کې پاکستان ته سفر کړی او تللي پلاوي یې د پاکستاني مشرانو لوړه اراده تایید کړې چې په راتلونکي وخت کې به د ترهګرو د مالي سرچینو او غیرقانوني پیسو د لېږد د مخنیوي په برخه کې دوامداره کار کوي.
د پاکستان وزیراعظم شهباز شریف او د بهرنیو چارو وزیر بلاول بټو زرداري د ایف اې ټي ایف د دې پرېکړې هرکلی کړی دی.