د پاکستان وزیراعظم شهباز شريف ويلي، د سعودي عرب وليعهد محمد بن سلمان ته يې خواست کړی چې د مسجد نبوي په پېښه کې ککړ پاکستانيان خوشي کړي او هغه يې د خوشي کولو امر کړی دی.
میں سعودی ولی عہد جناب محمد بن سلمان کا تہہ دل سے شکر گزار ہوں کہ جنہوں نے میری درخواست پر سعودی عرب میں اپریل 2022 کے واقعے پر گرفتار پاکستانیوں کی رہائی کا حکم دیا۔ الّلہ تعالی سے دعا ہے کہ وہ ہمیں ایک دوسرے کی غلطیوں پر درگزر کرنے والا بہتر مسلمان بنائے۔
— Shehbaz Sharif (@CMShehbaz) October 26, 2022
شهباز شريف ویلي، د محمد سلمان مننه کوي چې د هغه خواست يې منلی دی. د پاکستان وزیراعظم د شورو/ چهارشنبې په ورځ د سعودي عرب دوه ورځنی سفر پوره کړی دی.
د پاکستان سرکاري میډيا [رېډيو پاکستان] ويلي، د مسجد نبوي په پېښه کې شپږو پاکستانيانو، خواجه لقمان، محمد افضل، او غلام محمد ته د اته کلونو بند او انس، ارشد او محمد سلیم ته د شپږو، شپږو کلونو بند سزاګانې اورول شوې وې.
ويل شوي د دې ترڅنګ طاهر ملک نومې تن ته د درېو کالو بند او 10000 سعودي ريالونو سزا او جرمانه اورول شوې وه.
د سعودي ګزټ په وېب پاڼه هم د سعودي عرب د سرکاري خبري ادارې سعودي پريس ايجنسۍ دغه خبر خپور کړی شوی چې د دوه سپېڅلو جوماتونو سرپرست وليعهد محمد بن سلمان د شهباز شريف په خواست پاکستانيان معاف کړي او خوشي کولو حکم يې کړی دی.
د روان کال اپرېل د میاشتې په وروستیو کې چې د پاکستان وزیراعظم شهباز شريف د وزیرانو سره سعودي عرب ته تللی وو، د هغه په وزیرانو مريم اورنګزېب او شاه زېن بګټي باندې په مسجد نبوي کې د غل، غل او غدار غدار نعرې وهل شوې او په ټولنيزو رسنيو په خپرو شوو ويډيوز کې ليدل شوي وو، چې يو تن د شاه زېن بګټي د وېښتو نه نيولی وو.
په ټولنيزو رسنيو ویل شوي وو دغه کسان چې په حکومتي وزيرانو يې نعرې وهلي دا د پاکستان تحريک انصاف ګوند پلويان وو. تحریک انصاف ګوند په دغه اړوند په رسمي ډول څه نه وو ويلي.
خو د يادې پېښې وروسته د پاکستان د کورنیو چارو وزیر رانا ثناالله ويلي وو، په دغه ناوړه پېښه به د کورنیو چارو وزارت د سعودي عرب نه غوښتنه کوي چې دغه پېښه کې د ککړو کسانو پرضد باید قانوني ګامونه واخستل شي.
او د تحريک انصاف ګوند فواد چودري د رانا ثناالله د بيان په غبرګون کې ویلي وو، عجيبه حکومت دی سعودي عرب ته خواست کوي چې پاکستاني مزدوران په سعودی کې ونیسي.
د جون په مياشت کې بيا داسې خبرونه مخې ته راغلي چې د سعودي عرب يو عدالت د مسجد نبوي په پېښه کې نيول شوي یو پاکستاني ته د درېو کالو بند او 10000 رياله جرمانې سزا اورولې ده.